جيتور X70 Plus واكسباندر وتيجو8.. مين حيطلع منها "صاغ" سليم؟

لو انت رايح تشتري عربية ولقيت منها نسخة 7 مقاعد وفارق السعر مش كبير.. حتشتريها؟

في اعتقادي ان العميل مش حيشتريها.. بالتأكيد في استثناءات لكن الأغلب مش حيغيّر قراره.

بعد الاعلان عن جيتور X70 Plus بقت "المنافسة" جامدة في فئة الـ7مقاعد فتعالوا نحكي شوية عنها

في 2024 كان اجمالي مبيعات فئة الـ7 مقاعد (تحت الـ2 مليون) حوالي 8772 وحدة.

في 4 شهور من 2025 اجمالي مبيعات نفس الفئة 2734 وحدة ، يعني ارتفاع حوالي 20%.

إقرأ أيضا للكاتب اسلام حويلة :

الفئة الأولى والثانية‼ أول موديلات BMW بدون حرف"i" في مصر
 

عندنا في فئة الـ7 مقاعد 11 موديل، 6 منهم مبيعاتهم كبيرة ، 3 منهم تحت المليون ونص المليون جنيه.. شيري تيجو 8 (CKD) وميتسوبيشي اكسباندر وجيتورX70 Plus المستوردة وشقيقتها الأحدث في السوق الـCKD.

في 2024 تراخيص تيجو 8 بلغت 2561 وحدة واكسباندر 2333 وحدة وجيتور X70 عادية وبلس مجتمعين بلغت 1806 وحدة

في 4 شهور من 2025 تراخيص تيجو 8 بلغت 719 وحدة واكسباندر 540 وحدة وجيتور X70 عادية وبلس مجتمعين بلغت 514 وحدة.

تيجو 8 سعرها مليون و 305 ألف وميتسوبيشي اكسباندر سعرها 1.39 الى 1.475 مليون جنيه، وجيتور سعرها 1.435 مليون جنيه.

تقريبا هنا الأسعار متقاربة نوعا ما ، اكسباندر أسعار فئاتها بتنافس تيجو وجيتور، السؤال هنا عميل اكسباندر ليه قرّر يشتريها؟

إقرأ أيضا للكاتب اسلام حويلة :

جيتور وساوايست‼️اللعب بقى ع المكشوف..خلي السوق يحلو
 

في اعتقادي عشان اسم ميتسوبيشي (ياباني واعتمادية) وعشان م الآخر مش عايز صيني.

طيب جيتور المجمّعة محليا نازلة بمليون 195 ألف جنيه، هل هنا ممكن العميل يغيّر قراره وبدل اكسباندر يشتري جيتور؟

وارد توفير 200 ألف جنيه يغيّروا قراره، بس خد بالك ان اسم "غبور" واعادة سعر البيع مفرقش معاه واتمسك بـ"اكسباندر" بدل تيجو8.

طيب نسيب اكسباندر واللّي اعتقد ان مبيعاتها مش حتتأثر خاصة بعد اضافة فئة جديدة ليها ، ايه الموقف بين الاثنين تيجو8 وجيتور X70 plus؟

الفرق 110 ألف جنيه.. يعني جيتور عينيها على ألف عميل ع الأقل رايح لتيجو8 و ألف عميل من الباقي..

طب هل حتقدر جيتور تنتج العدد ده من العربيات في ظل أزمة "المكونات"؟

طب هل منطقي ان شيري حتقف تتفرج؟

حنشوف