اسلام حويلة يكتب : ابرز الملاحظات على تراخيص العربيات في أبريل

باستثناء شيفروليه أوبترا وتيجو4 برو في انخفاض ملحوظ في تراخيص العربيات المجمّعة محليا، ويمكن ده سبب النزول غير المتوقع في شهر أبريل.

👈مفيش حد بيجمّع محلي إلا وسألته عن تدفق المكونات اللازمة للتجميع، وكلهم بلا استثناء نفوا أي تأخير أو قصور، مع ان الأرقام بتقول عكس ده.

👈بشكل عام كل تراخيص الـCKD وقعت في أبريل.. تقريبا 3500 عربية ، وبقول تقريبا لأن في وحدات المرور المختلفة بيتم تسجيل مثلا MG بالانجليزي، ووحدات تانية إم جي، ومرة الارقام عربي ومرة أرقام انجليزي، فالمحصلة النهائية مش بتكون دقيقة ، لكن اجمالا الخطأ مش بيزيد عن 5% في أقصى الأحوال.

👈نيسان صني نزلت من 1071 وحدة في مارس لـ767 وحدة في أبريل، هيونداي AD نزلت من 790 في مارس الى 672 وحدة في أبريل، تيجو7 من 347 إلى 303 وهكذا..

👈أوبترا اللي زاد سعرها.. تراخيصها ارتفعت من 330 الى 458 وحدة في ابريل وتيجو 4 برو من 299 في مارس إلى 397 في أبريل.

👈أما لو شفنا تراخيص العربيات الـCBU "المستوردة" فمثلا عندنا فيات 500x من 522 وحدة في مارس لـ140 في أبريل ، وده غالبا لأن الشحنة خلصت.. في المقابل عندنا نيسان قشقاي طلعت جامد ،رخّصت 412 وحدة في ابريل من 181 وحدة في مارس.

📌نيجي لعروض التخفيضات السعرية

👈العروض على بايك وشيري تيجو وتاليانت جابت رد فعل ايجابي ، ويبدو ان السعر في العرض هو الانسب للعربية، لأن المبيعات أصبحت الضعف تقريبا ، مثلا بايك X55 رخّصت في ابريل 220 عربية من 107 في مارس، رينو تاليانت من 129 عربية في مارس الى 286 عربية في ابريل.. تيجو 7 برو من 69 الى 130 عربية في ابريل.

👈تفضل فولكسفاجن تيجوان أكتر عربية CBU ترخيصا للشهر التاني على التوالي بعدد 468 وحدة ، وتفضل MG ZS أكثر عربية صيني ترخيصا بعدد 441 وحدة.