اسلام حويلة يكتب : تكنولوجيا في شكل عربية‼ في صحة لينك اند كو

خلال ايام مجموعة عز العرب حتقدم بشكل رسمي علامة Lynk&Co في مصر، ودي علامة مختلفة عن أي علامة تانية ، لأن ولادتها مختلفة، اسمها وفكرتها.. ممكن تشوفها علامة فاخرة في منها كتير.. بس لو انت مهتم بالعربيات حتعرف بسهولة انها مختلفة.

مبدئيا Lynk&Co هي جزء من فولفو ، مش من جيلي ، تقدر تقول ان العلاقة الوحيدة مع جيلي هي التمويل، والإدارة.. لكن كتصميم وهندسة وغيره هي فولفو.

حتى بعد ما فولفو باعت حصتها من اسابيع لزيكر ، تظل الامور كما كانت عليه.

قصة Lynk&Co بدأت سنة 2013 بتكليف الانجليزي الراحل بيتر هوربوري بتصميم عربية مختلفة ، وهوربوري كان رئيس التصميم في فولفو ونائب الرئيس للتصميم في جيلي، هوربوري استعان بـ400 مصمم من كل مكان واتجمعوا في مركز الـR&D وستديوهات التصميم في جوتنبرج في السويد –معقل شركة فولفو- وبدؤوا الشغل.

في 2016 طلعت أول عربية للنور Lynk&Co 01 في برلين في ألمانيا، بس الأول الضيوف اتجمعت في السويد وبعدها بيوم طاروا على المانيا..

الفكرة الرئيسية والفلسفة لعلامة Lynk&Co تتلخص في 🔥احنا مش عايزين عربية فيها تكنولوجيا، احنا عايزين تكنولوجيا في شكل عربية🔥

طبعا متخصصين كتير اتكلموا عن انتشار العربية في اوروبا ، يمكن بسبب فكرة مشاركة العربية‼

الشخص العادي بيستخدم العربية بمتوسط 4% بس من اليوم ، فحضرتك تستفاد بالـ4% بتوعك وغيرك يستفاد وتكسبوا في نفس الوقت.

إزاي دي❓

تطبيق Lynk&Co بيساعدك انك تأجرها من مالكها أو تدخل شريك مع مجموعة وتدفعوا اقساط ، وليك وقت محدد لاستخدام العربية ، وباقي الوقت للشركاء، في وقتك لو مش حابب تستخدمها تأجرها بالساعة.

التطبيق بيقولك لو انت حابب تستأجر أماكن تواجد العربيات وتكلفة الساعة كام وكده يعني، طبعا الفكرة دي صعب تمشي في مصر بسبب طبيعة التملك عندنا.

بالمناسبة..Lynk&Co عندها 7 موديلات ما بين بنزين وكهربا و Plug in Haybrid ، و بخصوص الـ Euro Ncap فهي واخدة تصنيف 5 نجوم.

نكمّل بكرة ونستعرض الموديلات والاسعار والأقرب للنزول