اسلام حويلة يكتب : تراخيص السيارات الكهربا في أبريل : سمك..لبن.. تمر هندي

خلينا نتكلم مبدئيا عن العلامات الممثلة بشكل رسمي في مصر، عندي تساؤلات ملهاش اجابات واضحة، مثلا عندنا 4 علامات كهربائية بيقدموا 8 موديلات، وعندنا علامات قائمة بتقدم موديلات كتير، لكن يظل الأداء متواضع جدا مقارنة بالاستيراد الموازي، ولم يصنع الفارق في متوسط تراخيص العربيات الكهربا الشهرية.

حاجة تانية مثلا، لمّا علامة محدش يعرفها غير المتخصصين "أوي" زي Neta ترخّص 20 عربية في مارس (كلهم ترخيص مرور النزهة) و22 عربية في أبريل، يبقى في حاجة مش مفهومة.. صحيح أغلب الظن هي لشركة متخصصة في النقل الذكي ، وعن طريق الوكيل شركة ناتكو (لم يعلن بشكل رسمي).

يعني علامة مش معروفة قدرت تعمل "ديل" كويس ، وعلامات ملء السمع والبصر معرفتش.

إقرأ أيضا للكاتب اسلام حويلة :

تراخيص أبريل : انخفاض في المبيعات ..نيسان على القمة وبايك في الطالع
 

سؤال تاني : ايه العامل الأهم في شراء العربية الكهربا.. مدى السير .. السعر .. الوكيل والضمان ؟

عربية MG4 مدى سيرها متوسط ورخّصت 33 وحدة ، علامة اكسبنج الأقدم رسميا في مصر، رخّصت 25 عربية منهم 2 موديل X9 الوكيل مقدمهاش لسّة. وزيكر مدى سير كبير برضه رخّصت 14 عربية.

فولفو XC30 رخّصت 7 وحدات، في حين علامة سمارت رخّصت 3 عربيات

في أبريل تم ترخيص 543 عربية كهربا ، منهم 108 عربية BYD و97 عربية فولكسفاجن، ومعاهم أفاتر 15 عربية، يعني 40% من التراخيص جاي من 3 علامات استيراد موازي، مرسيدس رخّصت 79عربية وBMW رخّصت 29 عربية والعلامتين فيهم استيراد وفيهم وكيل.

إقرأ أيضا للكاتب اسلام حويلة :

تكنولوجيا في شكل عربية‼ في صحة لينك اند كو

يعني مفيش عامل أهم في قرار الشرا.. سمك لبن تمر هندي

الأداء الرسمي للسيارات الكهربائية بعيد أوي.. فهل ده يعكس التدافع في الحصول على وكالات رسمية كهربائية؟

طيب هل بعد هوجة البروتوكول الصيني والاوروبي .. حصل تغيير؟

الارقام بتقول لأ

الأرقام بتقول كمان اننا محتاجين نشتغل على تقنية الـ hybrid plug in يمكن تكون الحل فعلا لزيادة المبيعات وزيادة ثقة العميل بفكرة منظومة الطاقة النظيفة.