اسلام حويلة يكتب :

سيتي راي .. هل حتكون جيلي من الـ Top 10في مصر؟ ولّا ....

جيلي سيتي راي

علامة جيلي في مصر واجهت شوية صعوبات في الانتاج المحلي، صحيح محدش قال ولا حيقول كده، بس أرقام التراخيص في النصف الأول من 2025 بتقول ان جيلي امجراند (631 وحدة) وكول راي (589وحدة) مش في مكانتهم الطبيعية.. الطبيعي العربيتين دول يكون محققين ضعف الأرقام عالأقل.

لكن وحسب المعلومات اللي توفرت عندي ان اللي فات كله بمشاكله وأزماته انتهى ، وان العربيات حتتواجد في صالات عرض الموزعين المعتمدين للوكيلين أبوغالي موتورز وأوتوموبيليتي خلال الأيام الجاية.

ومش كده بس، ده حيكون بالتزامن مع طرح العربية سيتي راي الجديدة تماما على السوق ، ودي عربية ممكن نقول انها تقع بين ستار راي وكول راي في فئة الـSUV-C.

إقرأ أيضا :

كريم نجار : ندمت على رفضي ضم شركة محددة وتجاوزت ذلك بسيات وسكودا

العربية بتنزل بمحرك 4 سلندر ، سعة 1.5 لتر توربو، قوة 181 حصان وعزم 290 نيوتن.متر. وناقل حركة DCT WET من سبع سرعات، وبالتأكيد جودة عربيات جيلي مفيش عليها اختلاف.

لكن يبقى السؤال الأهم وهو التسعير.. هل جيلي حتتنازل المرة وتسعّر العربية في ضوء المنافسة العنيفة اللي شايفينها في السوق الفترة دي؟

مجموعة جيلي بامتلاكها لفولفو ولوتس وسمارت وشراكتها مع استون مارتن و مرسيدس ورينو، وصلت لمستوى عال جدا سواء في التكنولوجي أو الجودة والـ"نوهاو"، وده دايما بيخليها أعلى في اسعار منتجاتها، ده غير انها في الترتيب التاني في مبيعات السوق الصيني بعد BYD.

جيلي لما نزلت بموديل GX3 Pro بسعر منافس قدرت انها تبيع (1924 وحدة) في 2024 لكن مع زيادة السعر باعت 214 في النصف الأول من 2025،وخد بالك كانت في فئة متعطشة لعربية كروس اوفر.