بعد اعلان "غبور" .. ديبال S05 بتكنولوجيا REEV 🔥❓ من هنا الكهربا حتبدأ بجد في مصر

تقدر تقول ان عصر سيارات الطاقة النظيفة حيبدأ فعليا قريب أوي، لأن بنزول علامة ديبال وتقديم موديل S05 تحديدا حيحصل اختلاف كبير في السوق عندنا.

ديبال S05 بتنتمي لفئة الـSUV-C اللي بتمثل 35% من مبيعات العربيات الملاكي.. احنا عندنا عربيتين بيمثلوا اكتر من 6 % من مبيعات الملاكي في مصر هيونداي توسان 3.2% وكيا سبورتاج 2.9%. وفي نفس الوقت بيمثلوا 17.4% من مبيعات الـSUV في السوق.

بعيدا عن "الهري والصياح" المعتاد ع السوشيال تعالوا نشوف ليه انا متوقع ان العربية SO5 تحديدا حتعمل نقلة كبيرة.

ديبال S05 طولها 4620 مم أطول من توسان 4510 مم ,اطول من سبوتاج 4495 مم ,وأعرض منهم، وقاعدة عجلات 2880 مم يعني مقصورة أوسع من توسان 2680 مم وسبورتاج 2670 مم.

العربية بتنزل بنسختين واحدة BEV والثانية REEV أو EREV (الأثنين واحد).. وخلينا في التانية بطارية مدى 200 كيلومتر ، يعني مفيش أي استهلاك وقود في مشاويرك اليومية ، لو سافرت.. فيها محرك 1.5 لتر دوره توليد كهرباء وشحن البطارية، يعني بنزين وبطارية مدى اكتر من 1200 كيلومتر.

العربية من جوه حاجة فاخرة ، شفتها في زيارتي لمعرض شانغهاي اللي فات، وممكن تشوفها بنفسك ع النت وتشوف اد ايه هي مبهرة.

طيب نيجي للعلامة نفسها.. ديبال علامة من مجموعة شانجان ،وكيلها مجموعة غبور ،اللي أعلنت رسميا في افصاح للبورصة يوم الخميس، يعني حتقدر بسهولة جدا تكسب ثقة العميل، مش حتشغل بالك لا بضمان ولا صيانة ولا قطع غيار.

طيب انا ليه قارنت بينها وبين توسان وسبورتاج؟

لأن كودياك وتيجوان عميلها مختلف وأسعارهم أغلى ، ولأن في عربيات أو علامات بتنزل هدفها التواجد واثبات نفسها ، وفي علامات بتنزل وعينها على حصة كبيرة من السوق، مثلا لما سوايست نزلت، دي نازلة تكون من الـTop 10 في 2026، شانجان لما قررت تجميع محلي كذلك، فهنا المقارنة بتكون مع اكبر عربيات بتبيع.

سعر ديبال S05 في مصر

أهم نقطة في كل ده السعر.. سيبك من الصياح اللي حيطلع بأسعار لازم ولا بد وشوية "هبد".. لكن العربية لو نزلت ما بين 1.6 و1.7 مليون جنيه حتعمل “قلبان”