اسلام حويلة يكتب عن تراخيص العربيات الصينية في مايو .. الـTop 10

لغة الأرقام هي الوحيدة اللي ممكن نعتمد عليها في أي تحليل، لأنها زي ما قلت قبل كده كتير بتبيّن الصورة الحقيقية والواقعية للسوق بعيدا عن الأهواء و"الشخصنة".

خلينا نبدأ سلسلة موضوعات تحليل أرقام التراخيص بالعربيات الصينية

اكثر عربية رخّصت في مايو هي MG ZS بعدد 709 وحدة، وده ارتفاع كبير عن متوسط الشهور الأربعة الأولى من 2025 اللي كان 433 وحدة.

العربية التانية هي شيري تيجو 4 برو بعدد 553 وحدة، ويمكن زملاء كتير نشروا رقم مختلف عن ده ، لكن قلت قبل كده انه بيكون بعد التفاصيل في تقرير التراخيص .. زي مثلا في حالة تيجو 4 برو، انك حتلاقي خانة تانية باسم تيجو 4 ، يعني في رخصة عربية مكتوب فيها تيجو 4 برو ورخصة تانية تيجو 4 بس.. ومش دي الوحيدة في التقرير في حالات كتير بنفس الشكل.

إقرأ أيضا للكاتب اسلام حويلة :

خد بالك 📢السوق بعد 18 يونيو حاجة تانية 🔥شانجان ح "تولعها"🔥
 

الثالثة MG 5 بعدد 545 عربية، وبرضه في طفرة كبيرة في المبيعات لان متوسط تراخيصها من يناير لـ أبريل كان 237 عربية في الشهر.

أهم ملاحظة في التقرير كانت في جاك S2 .. من 66 عربية في مارس لـ129 في أبريل لـ383 في مايو، قفزات محترمة جدا، وكمان قبل تقديم النسخة المجمّعة محليا.. عرض تخفيض السعر جاب نتائج جيدة ، خد بالك العرض بدأ يوم 15 أبريل  يعني خلال اسبوعين بس حصلت الزيادة دي.

الملاحظة التانية هي استمرار أداء علامة بايك للشهر التاني ع التوالي من خلال موديلي X55 وU5 plus وتواجدهم ضمن الـTop10.. مجموعة EIM عاملة أداء محترم جدا في كل علاماتها.

بالمناسبة .. كل الموديلات الموجودة في الرسم التوضيحي بيتجمعّوا أو حيتم تجميعهم في مصر باستثناء موديل واحد بس.. ايه هو؟