اسلام حويلة يكتب :

وكيل BYD في مصر؟ الفطيم الأقرب وسوق الكهربا مش حيكبر "إلا"

BYD Seal

سؤال منطقي جدا، شركة رقم 1 على العالم ، سمعتها سابقاها ومع ذلك لا حس ولا خبر في السوق المصري، وكل شوية يطلع كلام عن مفاوضات ، والحقيقة ان المفاوضات شغّالة من سنين، ومفيش شركة عاملة في مصر مفتحتش كلام مع BYD.

أول مشكلة بتقابلها الشركات هي حجم المبيعات، BYD عايزة تنزل من هنا وتاكل السوق من هنا، الكلام عن 3و4 آلاف عربية دول تلعب بيهم، عايزين 15ألف وانت طالع، وكل سنة زيادة.. طبعا ده "تارجت" صعب جدا يتحقق لطبيعة سوق العربيات الكهربا في مصر، وكمان اسعار موديلات BYD مش رخيصة.

المشكلة التانية BYD عايزين يحققوا مبيعات وانتشار كبير وفي نفس الوقت عايزين وكيل معندوش علامات كتير ومنافسة، ويكون عنده سابقة مبيعات ضخمة.. ومش مهتمين أصلا بالتصنيع في مصر.

إقرأ أيضا للكاتب اسلام حويلة :

جيتور X70 Plus واكسباندر وتيجو8.. مين حيطلع منها "صاغ" سليم؟

أقرب وكيل حتى اللحظة هو شركة الفطيم للنقل الكهربائي (احدى شركات مجموعة الفطيم الاماراتية) ، هو وكيل BYD في الامارات والسعودية، وبالتأكيد عنده خبرة كبيرة بالسوق المصري من خلال وكالة تويوتا ولكزس وهوندا.

بشكل عام BYD تركيزها الكامل في السوق الصيني، وعينها على السوق الأوروبي، بس تحس انها مهتمة من بعيد شوية، لسة مش وقته الدخول بقوة واللعب التقيل، معندهاش داع للاستعجال، همّا أصلا مش ملاحقين ع الصين لوحدها.

بس دايما خلينا نقول ونعيد .. سوق العربيات الكهرباء في مصر مش حيكبر أبدا طول ما احنا شغّالين على "الفواخر".. لازم نشوف عربيات بالضمان والصيانة بأسعار تحت الـ2 مليون جنيه.. مش لازم تبقى BEV أي عربية بالطاقة الجديدة تكفي بأي نوع.. ولازم يبقى مدى السير كبير، ساعتها حتلاقي السوق بيكبر كل سنة، أمّا طول ما احنا شغّالين على عربيات بـ3 مليون وحتى لو بـ2 مليون جنيه وشوية زي الـID والـBYD استيراد حتفضل المبيعات محدودة.