العربية البيّاعة في كل علامة..هيونداي وشيري كسروا القاعدة ..مين تاني حيكسرها؟

عندنا 15 موديل رخّصوا اكثر من 1000 وحدة من يناير حتى أبريل 2025، لو استعرضت الموديلات الـ15 حنلاقي ان علامتين بس همّا اللي ليهم اكتر من موديل في القائمة دي.

وعشان أوضح أكتر، دايما حتلاقي في السوق المصري كل علامة ليها عربية بتبيع كتير "رأس الحربة" وباقي موديلات العلامة بستند.. مش بقول مش بيبيعوا، لكن انا بتكلم عن حجم مبيعات كبير.

حتلاقي ضمن الـ15 موديل 3 عربيات من علامة هيونداي وزيهم 3 عربيات من علامة شيري، وكل عربية من التسعة الباقيين بعلامة.

اقرأ أيضا للكاتب اسلام حويلة :

علامة KAIYI.. نقطة ومن أول السطر وشكر خاص لـ Mr. Jiang Sheng

 

لو رجعنا سنين لورا .. كنا حنلاقي شيفروليه مثلا عندها أوبترا وأفيو ولانوس ، كيا سيراتو وكارينز وبيكانتو، رينو لوجان وستيب واي،وهكذا، لكن مع تطور السوق ودخول علامات كتير وموديلات ياما ، واختفاء أسماء تاريخية في مصر زي لانسر وفيرنا ، اختلف الوضع خالص، وأصبح ان علامة يكون ليها اكتر من موديل مسألة غاية في الصعوبة.

طبعا ملناش دعوة بتويوتا كورولا.. دي "الهرم الرابع".. شركات تطلع وشركات تقفل وهي زي ماهي، موديلات تتغير واشكال تتعدل وهي على وضعها.

بس هل مفيش غير العلامتين دول❓

اقرأ أيضا للكاتب اسلام حويلة :

رئيس شيري انترناشيونال يجاوب على سؤال : Too many Brand❓
 

طبعا في علامات قريبة زي MG ،وارد نلاقيها خلال 2025 ومعاها نيسان لو استمر أداء قشقاي حتلاقيها مع الـ"صني"، بس مش عارف هل ممكن نلاقي علامة خامسة ليها أكتر من موديل في قائمة الـTop15 الأكثر مبيعا❓

طول عمرنا بنسمع عن Top10 ..جبت منين Top15 دي❓

ما انا قلت جبت كل الموديلات اللي عدّت الالف عربية في الـ4 شهور، طب خلينا نشوف الـTop 10 عشان متزعلش.

التغيير الوحيد ان هيونداي حيكون عندها موديلين اثنين AD وتوسان، وشيري زي ماهي بثلاثة موديلات تيجو 7 وتيجو 4 برو و أريزو5

بالمناسبة.. كل شركات التجميع المحلي منتظرة الاسبوعين الجايين عشان تعديل بعض بنود استراتيجية صناعة السيارات.. ده أصلا المكونات المحلية يا دوب مغطية نص الانتاج.. حنشوف