اسلام حويلة يكتب : كل تخفيض وراه حكاية..منها الظاهر ومنها اللّي في "بطن الزير"

ها.. خلصنا تخفيضات ولا لسة في تاني؟

مش باقي في السوق غير MGتقريبا، ولسة مش عارفين حيحصل ولا لأ؟

👈أصل طالما التخفيضات شغّالة السوق حيفضل واقف، ماهو مفيش معنى أبد اني اشتري عربية والاقي نفسي خسرت 100 ألف جنيه بعدها بيومين، صحيح ده نصيب وأرزاق، بس برضه مش حيجرى حاجة لو استنيت شوية أو شويتين.

👈التخفيضات دايما وراها سبب، محدش بيصحى الصبح زهقان فيقول نزّل يابني الاسعار شوية،ده الدواء مبيحصلش فيه كده، حيحصل في العربيات مثلا.

👈العامل الاساسي في تخفيضات الأسعار هو المنافسة ، والعرض والطلب ، اوضاع مستقرة ، استيراد مفتوح، سعر دولار بيلعب بقاله فترة في نفس المنطقة العرضية..

👈ناس كتير بتتكلم في تسعير مكنش منطقى، ومع المنافسة حصل التخفيض والنزول في الأسعار، مع المنافسة، يعني لو فكرنا كده ايه اللّي حصل خلى هوجة الخفيضات تنزل، حنلاقي الموديلات الجديدة اللّي اتقدمت، بداية من فيات تيبو مانيوال ، وبعدها عرض نيسان صني، ونزول جيلي امجراند وبعدها شيفروليه أوبترا.. كل ده ضغط على الكل وشد السوق لتحت ، لكن زي ما بيقولوا القشة التي قصمت ظهر السوق كانت في نيسان قشقاي وبعدها أوبل جراند لاند اللّي جابت الناهية...

أوبل جراند لاند الماني كبيرة كل الأوبشن فيها، ووكيلها المنصور للسيارات، يعني يعني المقارنة معاها لصالحها تماما ، تبعد عنها شوية في السعر حتلاقي قشقاي واقفة بتاخد كل اللّي نازل منها، المنطقى والطبيعي انه يحصل تخفيض سعري عند المنافسين و"هلمّا جرا".

بس هل المنافسة لوحدها السبب في تخفيض الأسعار؟

👈لأ طبعا في تخفيضات بتحصل لأسباب تانية "تمهيدية" حتبان خلال الربع التاني من السنة ، صعب أقولها حاليا.