اسلام حويلة يكتب : هل تسبب الأوفر برايس على السيارات في تغيير قرار الشراء؟

تعالى نفكر بصوت عالي ونشوف شوية ملاحظات في تقرير تراخيص المرور للعربيات الملاكي الزيرو لشهر فبراير

وانا بشوف أرقام تراخيص شهر فبراير لقيت زيادة في تراخيص هيونداي اكسنت RB ( 453وحدة من 290 في يناير) وشيري اريزو5 (406 وحدة من 342 في يناير) ، العربيتين دول تحديدا لو واخد بالك همّا المنافس المباشر لشيفروليه أوبترا الجديدة (283 وحدة) اللّي نزلت في آخر يناير.

اكسنت واريزو موجودين زي ماهمّا، لا نزلت أسعارهم ولا نزل عليهم عروض أيا كانت، ومع نزول أوبترا ..الطبيعي في ظل المنافسة انهم يحافظوا على مستوى المبيعات، لكن انك تلاقي زيادة مش قليلة.. فده استوقفني.. خاصة ان أوبترا نزل عليها أوفربرايس من التجار تاني يوم تقديمها على طول.. فهل الأوفر برايس خلى عميل الفئة دي يغيّر اتجاهه ويروح لعربيات تانية في نفس الفئة؟

إقرأ أيضا للكاتب اسلام حويلة : 

تراخيص فبراير.. لغز العربيات الكهربا في مصر‼العميل عايز إيه؟
 

كمان لو شفنا تراخيص سوزوكي سويفت الجديدة كليا، واللّي سعرها الرسمي 850 ألف جنيه لكن ده ع الورق بس، الاوفر وصل 100 ألف جنيه.. تراخيصها 19 عربية بس.. سويفت الشكل القديم مرخّصة 55 عربية في يناير.

فهل برضه الأوفر برايس كان السبب في اتجاه العميل لعربيات تانية مثلا زي جاك S2 (55 وحدة) أو بايك U5 Plus (51 وحدة).

ملاحظة تانية.. هيونداي  ADتراخيصها(717 وحدة) زادت عن يناير(641 وحدة)، رغم بدأ تسليمات جيلي امجراند (أول فئة) المنافس المباشر ليها في نص فبراير (91 وحدة).

حتى شيري تيجو 4 برو (412 وحدة) اللي موجودة في نفس الفئة السعرية برضه زادت عن يناير (377 وحدة)..

إقرأ أيضا للكاتب اسلام حويلة : 

تراخيص فبراير.. السوق "زي الفل" والتجار بـ"تطلم"َ!! اومال لو "اتهبد" كانوا عملوا ايه؟
 

طب ونيسان صني موقفها إيه؟

صني تراخيصها نزلت من 1348 وحدة لـ1204 وحدة في فبراير، لكن لسة بتلعب لوحدها فوق الألف وحدة شهريا

بشكل عام تقدر تقول ان شريحة العملا من مليون و100جنيه فما تحت زادت بشكل ملحوظ، وتسببت في موازنة المبيعات في شهر فبراير، لأن اكثرية الموديلات فوق المليون و100 ألف جنيه تراخيصها قلّت.

بالمناسبة.. جيتور T2 مرخّصة 283 وحدة من 87 وحدة في نياير، ويبدو انها في طريقها انها تكون لاعب أساسي في السوق المصري

نكمل بعدين..