تقرير تراخيص شهر مارس : طبعا في زيادة‼ وتخفيضات الأسعار "تحكم"

يمكن من المرات المعدودات ان شهر رمضان يحقق مبيعات اكتر من المتوقع، شهر رمضان أو مارس تم ترخيص 14533 عربية جديدة ، وبكده يكون أعلى من يناير(14148وحدة) ومن فبراير (13805 وحدة).. وبالتالي الربع الأول من 2025 قفل 42486 عربية، ده يقول ان مبيعات 2025 حتعدي الـ200 ألف عربية.

 

المتغير الوحيد الحاصل كان عروض التخفيضات و"الحرق" ، يمكن بالنسبالي ده التفسير الوحيد للزيادة عن فبراير وان كانت طفيفة (728 عربية)، وده معناه ان العروض وتسعير العربيات اللّي نزلت جديد خلّت الناس تشتري في شهر هو الأقل مبيعا، وان الزبون موجود باستمرار بس مستني أفضل فرصة.

 

العلامات الخمسة الأكتر ترخيصا هما نفسهم وبنفس ترتيبهم في فبراير ، هيونداي الأول (1687 وحدة)، نيسان (1459ووحدة)،شيري (1394 وحدة) MG(1151 وحدة) مرسيدس (974وحدة).

 

بس خد بالك الأربعة الكبار مبيعاتهم قلّت عن فبراير وان كان بصورة قليلة ، وده برضه يأكد فكرة "التخفيضات"، حتى علامات جيتور وسيات تراخيصهم قلّت بشكل ملحوظ، ممكن يكون في تفسير تاني وهو عدم وجود "بضاعة" لان تراخيص بيجو وأوبل قلّت.

 

تعالوا نشوف ابرز العربيات الجديدة وتأثيرها..

 

فيات عملت ضعف تراخيص فبراير، من 372 إلى 742 عربية، عندها تيبو مانيوال و 500X أسعار ممتازة حتى بعد ما زادت.

 

شيفروليه من 454 الى 491عربية والسبب أوبترا طبعا (رقم 10 ع السوق)، وده اللّي خلى شيفروليه رقم 1 على اجمالي السوق (1713 عربية نقل وملاكي).

 

سوزوكي زادت من 186 الى 302 عربية ومعروف طبعا ان الشكل الجديد من سويفت نزل.

نيجي لأبرز التخفيضات في رمضان

 

ستروين صاحبة اكبر تخفيض أسعار زادت من 137 الى 212 عربية

 

تويوتا عملت تخفيض على كورولا زادت من 417 الى 586 عربية (كورولا تمرض ولا تموت).

 

بايك من 194 الى 413 عربية.. طفرة كبيرة تقول ان العلامة حتكون من الـ10 الكبار في السوق على آخر السنة.

 

كيا من 668 الى 750 عربية بموديلين اثنين بس ، ده لسة سبورتاج الشكل الجديد نازل في أغسطس والموجود في السوق بواقي الشكل القديم.

نكمّل بعدين