تراخيص فبراير.. السوق "زي الفل" والتجار بـ"تطلم"َ!! اومال لو "اتهبد" كانوا عملوا ايه؟

محتاجين نفهم كويس سوق العربيات ماشي إزاي.. في يناير تم ترخيص 14148 عربية ملاكي، وهوب بدأ الكلام على ركود كبير في فبراير، وشفنا سباق تخفيضات الأسعار الرسمية من الوكلاء نازل ورا بعضه.

لكن الحقيقة يا عزيزي ان السوق تقريبا زي ماهو، تراخيص فبراير13801 عربية ملاكي ، يعني نزل عن يناير347 عربية بالتمام والكمال.

ايه ده يعني كل اللطم والكلام على الركود على 347 عربية بس؟

إقرأ أيضا للكاتب اسلام حويلة :

كل تخفيض وراه حكاية..منها الظاهر ومنها اللّي في "بطن الزير"
 

أيوة يا معلم.. مش قلنا "صياح" فيسبوك مالوش "عازة"، يعني عندك علامة هيونداي الشهر ده عملت "ريكورد" مرخّصة 1729 عربية ، نيسان وشيري أداؤهم تقريبا زي ماهو وييجي بعدهم بشوية MG والخامس علامة مرسيدس بس بفارق كبير.

نفس الفقرة اللّي فاتت فوق دي بكررها كل شهر 

أومال فين شيفروليه أوبترا وجيلي امجراند؟

علامة شيفروليه رخّصت 491 عربية ، لسة انا بتكلم بشكل عام عن التراخيص ،لسة التفاصيل، بس أعتقد ان أوبترا تحديدا وفي 3 أسابيع (في اسبوع أو اكتر ورق التراخيص) باعت حوالي 350 عربية، ودي طلعة محترمة جدا.

أمّا امجراند فمتلحقش أصلا تظهر في التقرير لأن التسليمات بدأت 15 فبراير على الفئة الأولى من امجراند وبرضه عقبال ما الورق يخلص حتلاقي الشهر خلص.. حيبان بشكل أوضح مع الشهور الجاية ومع اكتمال تسليم الفئة التانية من امجراند وفئات كول راي.. وبشكل عام علامة جيلي رخّصت251 عربية يعني تقريبا ضعف تراخيص يناير.

إقرأ أيضا للكاتب اسلام حويلة :

العربيات في سنة 2025 بين البيع والـ"حنكشة"‼

يعني مفيش ملحوظة تانية في تراخيص فبراير؟

لأ طبعا في ملحوظة مهمة جدا.. علامة جيتور عاملة رقم تراخيص كبير، وتقريبا متحققش من وقت انتقال العلامة الى القصراوي جروب، جيتور مرخّصة 617 عربية، وتيجي في الترتيب السابع لشهر فبراير ، وده رقم محصلش إلا في أغسطس 2024 في عز الرواج والمبيعات.

بالمناسبة..علامة شيفروليه هي الأكثر ترخيصا في مصر بشكل عام بعدد 1916 وحدة ملاكي ونقل وباص.

نكمّل بعدين