اسلام حويلة يكتب : تجميع موديلات لادا الجديدة !! السوق حيحصل في ايه؟

اكتر عربية ليها إرث في مصر هي لادا بدون منازع، يمكن بقايا الاشتراكية، أي حاجة من ريحة السوفييت ، أي حاجة تحسسك ان روسيا موجودة وليها دور.. انا شخصيا مش عارف ايه التعلق الغريب من المصريين بعلامة لادا.

لاهي تصميم ولا تكنولوجيا ولا أي حاجة خالص، بالعكس ده ميزتها الوحيدة انها عاملة زي"الطوبة"، لا قدر الله ودخلت في عربية من بتوع اليومين دول ممكن "تجيبها" نصين.. ده يوم ما نزل منها باور كانت علامة.. اي واحد كان عنده لادا حتلاقي دراعه كله "عضل"، ولا اجدعها "باي وتراي"

إقرأ أيضا للكاتب إسلام حويلة :

العربيات في سنة 2025 بين البيع والـ"حنكشة"‼
 

لادا المملوكة حاليا لشركة أفتوفاز الحكومية الروسية وبعد تصريحات "أبوحنان" بوضع نهاية للأزمة الروسية الأوكرانية، حتعرف ترجع تصّدر عربيات تاني، وبالتأكيد مكونات انتاج، وكمان رينو مبقاش ليها تواجد في الشركة وغالبا مش حيكون.

طبعا الوضع في مصر محدش عارف حاجة عنه، الوكيل شركة الأمل بيقول انه مازال الوكيل الرسمي الوحيد ، ومن شهور شركة GV عملت مؤتمر وقالت انهم حيصنعوا موديلات لادا في منطقة طربول الصناعية ، وبعدين الكلام انتهى تماما من هنا ومن هنا.

إقرأ أيضا للكاتب إسلام حويلة :

انت كتاجر عربيات عامل "ناصح"‼ متزعلش لما "تحرق" أضعاف اللّي كسبته🤌
 

طبعا في أجيال متعرفش أصلا يعني ايه لادا ولا 2107 و2110 كل الّلي شافوه جرانتا وشوية صور، مساكين مشافوش الصاج بتاع زمان، كانت الترييحة تجيب ربع قدّماني لأي عربية

تفتكروا لو جمّعموا عيلة لادا فيستا المتطورة نسبيا في مصر ممكن تعمل ايه