اسلام حويلة يكتب :

هو ليه شيري و MG"راكبين" السوق مع وجود اكتر من 10 علامات صينية؟

MG ZS

هو ليه الأفضلية دايما لعلامات هيونداي وشيري ونيسان و MG؟ أو بطريقة تانية ليه الأربع علامات دول همّا الأكثر مبيعا في مصر بقالهم سنين؟

لو قلنا ان هيونداي ونيسان تاريخ طويل جدا سواء استيراد أو تجميع محلي، وبالتالي في ثقة تامة في منتجاتهم.. لكن لا شيري ولا MG عندهم نفس تاريخ هيونداي ونيسان.

لو شيري بسبب التجميع المحلي فMG كل موديلاتها استيراد.

لو اتكلمنا على دور الوكيل (المنصور وغبور) ففي وكلاء بقالهم 30 سنة واكتر وليهم وزن وثقل في السوق.

طب ليه شيري و MGراكبين السوق مع وجود 10 علامات صينية بتقدم منتجات ممتازة حقيقي؟

لو اتكلمنا ع الأسعار ففي موديلات منافسة جدا سعريا ورغم ده محققتش النجاح المفترض.

خد بالك انا شخصيا معنديش إجابة مؤكدة على التساؤلات دي..

طب ليه بقول الكلام ده.. لأني كل شهر لمّا بشوف تقرير تراخيص المرور مفيش علامة صينية قريبة أو بتقرب.. في أفضل الأحوال العلامة رقم 3 بتكون نص مبيعات رقم 2..

طب هل الوضع ده ممكن يتغير قريّب ونشوف علامات صينية منافسة ليهم؟

القاعدة ان الحفاظ ع القمة أصعب بكتير من الوصول اليها.. لكن متنساش ان لكل قاعدة ساتثناء

الشهور الجاية حنشوف

ننقل لنقطة تانية.. هل في تخفيضات أو عروض أسعار حتنزل تاني؟

شوف هو مش باقي تقريبا غيرMG وجيتور، فأمّا الأولى فاللّي سمعته انه مفيش تخفيض ولا عروض على الأسعار، وأمّا الثانية فينزل دلوقتي ليه أصلا، والطبيعي انه ينزل بالسعر قبل ما يتم الإعلان عن موديلات ساوايست الجديدة.. يعني على نهاية أبريل أول مايو.