إسلام حويلة يكتب : فرصة جاك JS2 العظيمة..وانسى أي أسعار مبالغ فيها بعد كده

الدراسات العالمية بتقول ان العميل لو قدامه عربية سيدان وعربية SUV بنفس السعر والمواصفات تقريبا، حيختار الـSUVبنسبة 90%، وده اللّي خلا أكثرية انتاج الشركات من العربيات SUV.

احنا في مصر عندنا عربية اسمها جيلي GX3 Pro لمّا نزلت باعت بالظبط 1924عربية في سنة 2024، ولولا وقف نافذة الاستيراد كانت العربية دي عملت ريكورد في المبيعات.

عربية نزلت بـ670 ألف جنيه ووصلت لـ730 ألف وهوب وصلت مليون ، ورجعت نزلت بـ860 ألف وبعدها 780 ألف وبعدها طلعت لـ960 ألف جنيه لغاية دلوقتي..(طبعا حصل تعويم زي ما انتوا عارفنين بس برضه كان التسعير وقتها وفق دولار الذهب مش دولار السوق السودا)

إقرأ أيضا للكاتب إسلام حويلة : 

 العربيات في سنة 2025 بين البيع والـ"حنكشة"‼

طبعا مع قرب سعرها لـ"المليون جنيه" تقريبا خرجت بره المنافسة،لأن بسعرها ده وحجمها مش حتقدر تنافس (27 عربية اترخصوا في يناير 2025)، بينها وبين كولراي حوالي 100 ألف جنيه، وامجراند السيدان أعلى فئة تزيد عنها 10 آلاف وحجمها اكبر.

طب انا بقول الكلام ده ليه❓

لأن تجربة GX3 وقبلها رينو ستيب واي بتأكد نفس الفكرة، ان حظوظ الـ SUV أكبر بكتير من حظوظ السيدان ، وعليه انا شايف ان فرصة جاك JS2عظيمة جدا بعد ما تتجمع وتنزل على أغسطس الجاي، العربية سعرها حاليا 795 ألف ولو استمر الاستقرار ممكن تنزل بعد التجميع بتاع 100 ألف جنيه، يعني م الآخر حتبيع زي الرز..لأن مفيش عربية تانية ممكن تنافسها في الحتة دي.

فرصة جاك JS2 في الاستحواذ على رقم مبيعات كويس حتضغط على عربيات كتير ، والسوق كله حيتشد لتحت،وغالبا حتلاقي عربية في كل فئة هي الأساس والباقي بيلف حواليها.. واحنا شفنا تسعير أوبل جراند لاند خلى المنافسين يعيدوا تسعيرهم من تاني، وكل شركة حاليا عندها خطط للخصومات والعروض السعرية.

إقرأ أيضا للكاتب إسلام حويلة : 

الاعلان عن موديلات ساوايست الجديدة في مايو 

بالمناسبة.. مفيش عربية حتنزل السوق بعد كده بتسعير مبالغ فيه، وان العرض والطلب بقى هو المتحكم في التسعير، وزي ما الوكلاء كانوا بيرفعوا السعر بناء على الأوفربرايس بقوا حاليا ينزلوا السعر بناء على "حرق الأسعار".