اسلام حويلة يكتب : العربيات في سنة 2025 بين البيع والـ"حنكشة"‼

👈في سنة 2024 تم ترخيص عدد 34300 وحدة أغلبهم أقل من مليون جنيه (سعر رسمي من الوكيل)، وبقول أغلبهم لأن مثلا في فئات من AD عدّت المليون خلال 2024.

👈الـ34300 عربية دول موزعين على 24 موديل، منهم اللّي خرج زي تيجو3 و HD وBYD F3 اللّي اتوقف انتاجها، ودي رخّصت 4070 وحدة في 2024.

التوقعات بتقول ان السوق حيزيد 20% يعني طبيعي عربيات تحت المليون جنيه توصل لحوالي41 ألف مبيعات؟

👈لأ طبعا.. الفئة دي مش حتزيد في أفضل الأحوال اكتر من 5%، الـ20% ده متوسط الزيادة ، فئة ما بين المليون ومليون 250 ألف جنيه حتزيد بتاع 30% ع الأقل، لأنها حتاخد عملاء كتير من تحت المليون جنيه ،وده حيظهر واضح في النص التاني من السنة عشان كم الموديلات اللي حتنزل.

👈عندنا جديد في 2025 بروتون ساجا وشيفروليه اوبترا وجيلي امجراند، والتحدي ان كل موديل فيهم ع الأقل يبيع 5 آلاف وحدة

وليه ع الأقل؟

👈عشان ده الحد الأدنى للاستفادة من الحافز الحكومي في نهاية السنة.

بس هل 5000 عربية ده رقم كبير؟

👈ده كبير جدا جدا، الـ24 موديل اللّي تحت المليون جنيه مفيش غير نيسان صني بس اللي عدّت الرقم ده ، وبالمرة (معاها فوق المليون جنيه سبورتاج و كورولا وتوسان).. بس كده.

طيب مين ممكن يوصل لـ5 آلاف وحدة في 2025 مع صني؟

👈هيونداي AD في 6 شهور رخّصت 3461 يعني بالمتوسط حتعدي الـ5 آلاف عربية،امجراند و اوبترا حيعدوا.. بس كده⛔

بس بروتون ساجا (630 ألف) أرخص من أول فئة شيري أريزو5 (665 ألف) بـ35 ألف) ومن نيسان صني (695 ألف) بـ65 ألف جنيه؟

👈بروتون ساجا حتبيع بس مش حتوصل للرقم ده في 2025،ومش مطلوب منها ده، لو وصلت لـ2500 عربية في 2025، يبقى تمام وحتعدي الـ5 آلاف في 2026، خد بالك الفئة دي من المستهلكين مش كبيرة والخيارات كتيرة، وأريزو5 و BYD F3 مقدروش يوصلوا للرقم ده رغم انهم الأرخص وبقالهم سنين في السوق.

طب وباقي الـ24 موديل؟

‼منهم اللّي حيبيع وينافس ومنهم اللّي "حيحنكش" ومنهم اللّي مش جاي تاني‼

تفتكروا موديلات ايه اللّي حتحنكش؟