اسلام حويلة يكتب : اكسبنج G6..أهي العربيات الكهربا بدأت ..ما تاخد تشحن

سوق العربيات الكهربا الطبيعي انه يبدأ يكبر، هو ماشي بقاله 3 شهور بمتوسط 500 عربية في الشهر، منهم حوالي 75 عربية من الوكلا والباقي استيراد شخصي ومبادرة.

عندنا حاليا علامة اكسبنج وعلامة سمارت وخلال أيام زيكر وأيونيك .. انا بتكلم عن علامة كهربا بالكامل ، وعندنا مرسيدس و BMWواودي كـ"فواخر" وفولفو و MG وشيري. 'طبعا BMW i5 في حتة لوحدها❤️

اعتقادي ممكن نصّنف عملاء العربيات الكهربا لثلاث فئات :

إقرأ أيضا للكاتب إسلام حويلة :

الاعلان عن موديلات ساوايست الجديدة في مايو .. و45 يوم قائمة انتظار شيفروليه أوبترا
 

1️⃣ناس عايزة تستمتع بسواقة "الكهربا" ، وغالبا بتبقى عربية تانية sconed car ودول عملاء "الفواخر" ومن ضمنهم زيكر 001 وأفاتر.

2️⃣ شباب بيلعب تحت الـ2 مليون جنيه ونص ، وغالبا بيروح بدون تفكير للمستورد زي فولكس فاجن ID.4 واخواتها و BYD سونج و L.

3️⃣همّا نفس الفئة الأولى، بس هنا مش بيسوق العربية، غالبا بتبقى عربية العيلة أو عربية بنته وابنه،ودول اتجاهم مثلا اكسبنج G9 كعيلة، أو فولفو XC30 واشقائها سمارت هاشتاج 3 وزيكر X... طبعا يفرق جدا معاه الضمان والخدمة.

الطبيعي ان مبيعات الأولى والثالثة مجتمعين أقل من مبيعات الفئة الثانية، وهنا نتكلم عن الوضع المتوقع الفترة الجاية.

قولا واحدا مفيش عربية كهربا حيقدمها أي وكيل تحت الـ2 مليون جنيه ونص حتبيع، وأقصد انها تعمل رقم مبيعات، لأن مفيش وجه مقارنة نهائيا في الأسعار مع العربيات المستوردة شخصي ومبادرة.. والسبب طبعا الدعم الحكومي في الصين، لأن المستورد بيشتريها عليها الدعم من تاجر ويجيبها، غير الوكيل ..حياخدها بسعرها.

إقرأ أيضا للكاتب إسلام حويلة :

لمّا السوق كله بقى فتوات ..أومال مين اللّي هينضرب؟!

طبعا انا بتكلم عن مدى سير فوق الـ400 كيلومتر عشان نبقى واضحين ، عشان في ناس قاعدين "يتصيدوا" أي غلطة أو "هفوة".

بس الكلام اللي سامعينه ان الاستيراد الشخصي بقى صعب جدا؟

بس المبادرة شغّالة.. وفي حوالي 250 ألف موافقة مبادرة صلاحيتهم 5 سنين ، وحاليا كتير من أصحاب المبادرات بيبيعوا للتجار والمستوردين.. يعني الموضوع لسّة مكمل فترة على نفس الوضع.

بالمناسبة.. اكسبنج G6 تم تقديمها النهاردة في فئتين، الأولى مدى سير 440 كم وبسعر 2390000 جنيه،والثانية مدى سير 570 كم، بسعر 2590000 جنيه..ودي منافس قوي للمستورد