الاعلان عن موديلات ساوايست الجديدة في مايو .. و45 يوم قائمة انتظار شيفروليه أوبترا

كلام كتير وشائعات أكثر عن علامة ساوايست ووكيلها الجديد ، العلامة دي ليها قصة اتكلمت عليها قبل كده، بس المهم اننا نعرف ان العربيات الجديدة لـ"ساوايست" حيتم تقديمها في مصر في شهر مايو الجاي، وحاليا بيتم تجهيز مقرات ومراكز الخدمة والصيانة، وكمان تم الاتفاق مع العناصر الرئيسية في فريق عمل الوكيل الجديد.

إقرأ للكاتب إسلام حويلة :

قصة ساوايست وجيتور.. مين اللّي باع ومين اللّي اشترى والموقف الحالي في مصر
 

الكلام الداير ان شركة سيارات كبرى استحوذت على "ساوايست"، لكن حقيقة الأمر ان الشركة دي ملهاش علاقة بالتوكيل الجديد، وقائد فريق العمل هو شخص معروف في وسط القطاع بمهاراته في القيادة ودماثة أخلاقه.

المهم هنا انك لمّا تشوف صور الموديلات الثلاثة حتلاقيهم نسخة تكاد تكون مطابقة لموديلات جيتور، ما همّا في الأصل واحد ،وده يقولك اد ايه المنافسة حتشد جدا في الفئة دي.

نرجع للتريند، شيفروليه أوبترا الجديدة،العربية حاليا عليها قائمة انتظار من 30 الى 45 يوم، وطبعا نزل عليها أوفربرايس ، وصل لحد 60 ألف جنيه عند 🔥ملك الاوفر في مصر🔥 مين يعرف اسمه؟

إقرأ للكاتب اسلام حويلة :

سعر العربية التجميع المحلي يقل 20% عن المستوردة.. أوتوموبيليتي عملت كده ‼
 

فكرة الأوفربرايس بالنسبة لي مش مفهومة في حالة أوبترا، العربية تجميع محلي، يعني حتكون متوفرة باستمرار ، هي مش مستوردة عشان محدش ضامن حييجي منها ولا لأ تاني وبعد أد ايه❓

لأ استنى.. مش يمكن سعرها يزيد❓

👈ماشي ، خليني معاك.. حيزيد كام؟ 20 ألف مثلا، ماهو أكتر من كده حتكون فقدت ميزة مهمة جدا، والسوق في منافسة شديدة ، فكل زيادة حتكون بحساب .. فإيه يخليك تدفع 60 ألف جنيه أوفر عليها❓

يعني هو اللي فلوسه جاهزة وعليهم 50 أو 60 ألف زيادة، حيجرى ايه لو استنى شهر ونص مثلا ، لو عنده عربية يصبر الفترة دي، ولو معندوش ..ما انت بقالك فترة بدون عربية ..كمّلهم شهر ونص .. ميجراش حاجة يعني‼

عموما كل واحد دماغه مريحاه😎

بالمناسبة.. جيتور X70 هي ساوايست S07 وجيتور X90 هي S09 أما داشينج فهي S06 زي ما شفت في الصور