اسلام حويلة يكتب :

تراخيص يناير من "الفواخر" وBMW.. وعدد مهول من العربيات الكهربا جاية "مبادرة"

BMW M5

بمناسبة ان BMW مصر سجلت أعلى مبيعات لموديلات M في إفريقيا وشرق أوروبا ، قلت اتكلم النهاردة على "الفواخر" شوية..

حتلاقي كذا تصنيف للعربيات "الفواخر"، والاختلافات بينهم بسيطة ، لكن حتلاقي دايما ان قمة الهرم في قطاع السيارات هي علامة رولزرويس، ومجموعة BMW بشكل عام حتلاقيها دايما بتحط رولزرويس في حتة لوحدها خالص، مع ان الفئة السابعة فخر الصناعة البافارية ، لكن روزلرويس ممكن تشبهها بالامبراطورية التي لا تغيب عنها الشمس ، حاجة كده بتمثل العظمة البريطانية، الغطرسة، تحسها من سلالة ملوك العصور الوسطى.. خد بالك ان مش بتكلم عن الهايبر كارز ،عشان محدش يقولك فين كذا وكذا.

إقرأ أيضا للكاتب إسلام حويلة :

3 عوامل أساسية لنجاح أي عربية في مصر.. Rox 01 حققت اثنين بس

المهم .. تراخيص الملاكي في شهر يناير حتلاقي عربيتين رولز رويس تم ترخيصهم واحدة جوست (370 إلى 430 ألف دولار) والتانية سبكتر الكهرباء (بتبدأ من 423 ألف دولار).

في الترتيب التاني في التصنيف تيجي علامة بنتلي، ودي كانت محاولة انها تنافس الرولز بس.. (ايش جاب لجاب).. موديل بنتايجا (بتبدأ من 208 ألف دولار) رخّص عربية واحدة.

نيجي بقى لفيراري عم أعمام السوبر كار، رخّصت في يناير واحدة 296gts (بتبدأ من 347 حتى 370 ألف دولار).

إقرأ أيضا للكاتب إسلام حويلة :

الاعلان عن موديلات ساوايست الجديدة في مايو .. و45 يوم قائمة انتظار شيفروليه أوبترا

عندنا 3 لامبورجيني اثنين هوراكان والثالثة أوروس ، 2 مازيراتي واحدة جران توريزمو والتانية ليفانتي، وعربية مرسيدس G63 AMG وواحدة شيفروليه كمارو.

نرجع لـ M منBMW اللّي باعت ١٥٪ من إجمالي مبيعات BMW في ٢٠٢٤ ، وطبعا كان الوحش M5 الأكثر مبيعا من فئة الأداء العالي الـM ، 1000 نيوتن.متر و729 حصان عايز ايه تاني، معلومة ع الماشي كده احنا كصحفيين مصريين كنا أول ناس نشوفها في العالم في أول يوم عرض ليها في BMW Welt في ميونخ.

الـX5 اكثر مبيعا في فئة الـSUV والـM340i في فئة السيدان المتوسطة..الرقم الملاحظ في تراخيص BMW كان الفئة السابعة اللّي رخّصت 17 وحدة وباين ان نتايج رعاية مهرجان الجونة السينمائي ظهرت.

بالمناسبة.. في شحنة سيارات (مبادرة المصريين في الخارج) حتوصل خلال ايام، عدد السيارات في الشحنة مهول بمعنى الكلمة‼وأغلبها كهربا من الصين>