3 عوامل أساسية لنجاح أي عربية في مصر.. Rox 01 حققت اثنين بس

النهاردة شركة نورالدين الشريف نظمت مؤتمر صحفي لشرح وتقديم تقنية الـREEV الجديدة اللّي العربية Rox 01 شغّالة بيها، ودي أول عربية تنزل مصر بشكل رسمي بالتقنية دي- شرحها حتلاقيه في التعليقات- 

طبعا العربية والتقنية الجديدة وكل التفاصيل كتبت عنها قبل كده، لكن خلينا نتناول المسألة من زاوية تانية.. اختيار العربية نفسها Rox 01.

في اعتقادي ان اختيار أي عربية جديدة تنزل السوق المصري لازم يكون فيها واحد من 3 عوامل حاسمة للنجاح.. سعر محصلش، تكنولوجيا متفردة، وشكل مختلف..

اولا : سعر يكون غير متوقع بالنسبة لتجهيزات العربية

ثانيا : تكنولوجيا جديدة في عربيتك مش موجودة قبل كده وبالتأكيد تكون مطلوبة.

ثالثا : أمّا الشكل فشبيه لعامل التكنولوجيا.. تصميم مميز وغريب ومش موجود قبل كده.

اثنين من العوامل دي متوفرة في Rox 01 ، شكل مبهر وتكنولوجيا أول مرة في مصر.. السعر مش حيفرق ، انا معرفش سعرها حيكون كام ، بس على أسعار بره متوسط 50 ألف دولار ، يعني في حدود 3.8 – 4 مليون جنيه.

لكن وجهة نظري.. السعر هنا مش فارق أوي في مسألة الشراء، لأن اللّي مقرر يشتري العربية دي ..هو مذاكرها كويس ومتوقع متوسط سعرها، وبالتالي زادت أو قلّت 200 ألف مش حيغير قراره بالشرا، لأنه أصلا هو جاي على الشكل والتكنولوجي الجديدة.

وعايز أقولك ان عملا بتسأل عنها من شهرين وحاجزين بالفعل بمجرد ما انتشر الكلام عنها.

طبعا حتقولي لأ السعر مهم عشان تبيع كويس؟

الفئة دي من العربيات SUV-D مبيعاتها أصلا محدودة ، وفي الغالب يا تجميع محلي يا ترخيص سياحة وهيئات دبلوماسية، الحجم ده (3 طن) محتاج يا دوب 3500 سي سي ، يعني جمارك 270% وبالتالي حتسمع أرقام خيالية.

العربية للأسف مفيهاش keyless entry ولا start engine ، العربية بمجرد ما تقفل الأبواب وتدوس على الفرامل بتشتغل، ولمّا تقف وتفتح الباب "بتبطّل".

ونصيحة للّي عايز يشتري العربية .. متزهقش من رجل المبيعات عشان هو محتاج وقت طويل جدا عشان يشرحلك كل حاجة فيها.

بالمناسبة.. لقائي مع المهندس نورالدين الشريف وتفاصيل عنRox  وعن علامة فينوشيا اللي اخد توكيلها وعن N Auto Express ح أنشره بكره