تراخيص العربيات في مصر !! واضحة أوي .. خليك في "المضمون"

مبيعات مرسيدس وBMW في يناير تكاد تكون متساوية لمبيعات العلامات الصينية مجتمعة باستثناء شيري و MG ، ولو رجعنا الشهرين اللي فاتوا حنلاقي نفس العلامتين مبيعاتهم اكبر..وده أمر أعتقد انه محتاج نوع من الدراسة نفهم منها طبيعة العملا..

👈رغم الزخم والتعدد في العلامات، لكن الأرقام بتقول ان العميل المصري غالبا قراره بنسبة 80% على "المضمون" .. يعني عشان تقنعه يسيب علامات نيسان وهيونداي وشيري و MG(الأربعة نسبتهم من السوق 43.5 %) ومعاهم كورولا وسبورتاج محتاج وقت طويل ومجهود أكبر.. ونفس الشيء "الفواخر".. تفضل مرسيدس وBMW الاختيار المثالي والأضمن طول الوقت.. الأرقام بتقول ده.. سيبك من اللّي نفسك فيه.. خلينا مع الأرقام الرسمية للتراخيص.

طاه "المضمون" ده اللي هو ايه❓

👈المضمون يعني سعر اعادة بيع.. اللّي هو انتشار قطع غيار بأسعار رخيصة وصيانة في كل حتة

وهو مرسيدس وBMW اسعار قطع غيارهم رخيصة يابا الحاج❓

👈أيوة رخيصة بالنسبة لبورشة ولاندروفر ..وبيعهم مستعملين أسرع، اعرض من كل علامة موديل وشوف مين حيتباع بسرعة ومين ماسك سعر واحكم بنفسك.

👈برضه خد بالك مش معنى ان عميل معاه "فواخر" يبقى مش مهتم بالأسعار، ده مهتم اكتر من عميل عربيات التجميع المحلي ، مهتم انه ياخد سعر أقل وتجهيزات أكتر،.. أومال الـ80% من تراخيص مرسيدس استيراد رمادي وشخصي ليه‼ ده عميل مهتم جدا انه يحافظ على عربيته بالاستخدام القليل.

👈نرجع للعميل "المضمون" أو انسان التويوتا زي ما سميته قبل كده ، نسبة كام في المية من العملاء اللي رايحين يشتروا كورولا تحديدا غيروا رأيهم❓ دايما بيحصل العكس يتفرج ويشوف ويسأل وفي الآخر يجيب الـ"كورولا".. زي الصني والـAD وباقي "المضمون".

أيوة يعني كده العلامات التانية حتعمل ايه❓

👈عايزة نفس طويل.. طالما منتج بجودة عالية واسعار منافسة نجاح العلامة بيزيد مع الوقت.

👈بالمناسبة.. فولفو عن طريق وكيلها عز العرب حتقدم الشكل الجديد من XC90 الاسبوع الجاي، فولفو في مصر اللي فات حاجة والجاي حاجة تانية خالص