الأموال الساخنة بـ"تخلع" من العربيات.. وحرق الأسعار حيبقى ع المكشوف

نكّمل كلامنا عن انخفاض أسعار العربيات المتوقع خلال الفترة الجاية، ودي توقعات مبنية على وقائع حصلت وبتحصل وح تحصل

👈تقريبا تجار العربيات كلهم عارفين ان رأس المال اللي دخل السوق الثلاث سنين اللي فاتوا، بيخرج منه اليومين دول وحيخرج اكتر الفترة الجاية.

👈كل اللي كان معاه فلوس واستثمرها في تجارة العربيات وكانوا بيكسبوا أو بمعنى أصح "بيغرفوا" حاليا بيتخارجوا بفلوسهم ،عشان بقالهم كذا شهر مش شايفين مكاسب وكمان بيدفعوا من رأس مالهم "اللي كسبوه" تكاليف شهرية، وبالتالي خدوا القرار و"خلعوا".

👈وده أمر طبيعي ، مجال كان مربح وحاليا بقى "يخسّر" فأشوف مجال تاني للمكسب، زي فكرة الاموال الساخنة اللي بتدخل بلد ما بسبب ارتفاع فايدة السندات أو في البورصة، بمجرد ما يلاقوا بلد تاني رفع الفايدة.. هوب على هناك.

إقرأ أيضا للكاتب اسلام حويلة :

أخيرا أسعار العربيات حتنزل.. بركاتك يا 2025 وجاك JS2 المجمعة محليا في أبريل
 

👈مش كده وبس، كل الزبون التاجر برضه اختفى تماما، الاستثمار في العربيات بقى خسران، وكمان لو بصيت على "الفواخر" حتلاقي ان المبيعات "اتهبدت" رغم ان اسعارها اتهبدت برضه‼

👈ومن هنا نمسك طرف الحكاية، اللي بيشتري عربية بـ5 أو 6 مليون وانت طالع ده راجل متابع اقتصاد كويس وعنده رؤية للفترة الجاية، كون ان الشريحة دي من العملا "وقّفت" شرا فده ليه معنى.. شايفين ان فرصة الشرا بسعر أفضل جاية، سواء بـ"حرق أسعار" أو انخفاض الأسعار.. دي واحدة.

👈عد معايا.. جيلي اميجراند وكول راي واوبترا ونيسان ماجنيت وجيتور 70 وجاك S2 وستروين C4X وبروتون ساجا وشانجان CS55 و MG5 دول عددهم 10 موديلات تجميع محلي غير اللي موجودين اصلا (9 موديلات بخلاف مرسيدس وتويوتا وBMW)..فانت متخيل حجم المنافسة حيبقى عامل إزاي❓

ماهو دول لازم يبيعوا و"كتير".. فالمستورد حيعمل إيه وقتها❓

👈أقولك أنا.. مفيش موزع حيسيب فلوسه راكنة ويقعد يتفرج عليها.. "خسارة قريبة ولا مكسب بعيد".. كله حيشتغل "حرق".

طب والمحلي❓

👈4 موديلات بس من الهوجة دي كلها حيبقى عليها أوفر برايس والباقي بالسعر الرسمي

طب ايه همّا الموديلات دي❓

دي حاجة لو عرفتوها تبقوا عُمد🧙‍♂️

ايه رأيكم في الكلام ده ؟