اسلام حويلة يكتب : لمّا السوق كله بقى فتوات ..أومال مين اللّي هينضرب؟!

👈في كام عربية خرجت من السوق؟ او بمعنى أدق معندهاش فرصة انها تبيع؟ وانا أقصد انها تحقق مبيعات كبيرة، مش تبيع 100ولا 200 عربية في السنة.

👈في الفئة الاقتصادية تقريبا مفيش عربية مستوردة حتقدر تكمّل باستثناء MG5 ، حتكمّل آه بس مبيعاتها حتتأثر كتير، طبعا بعد تجميعها ده كلام تاني خالص.

👈الوضع حاليا ان بروتون ساجا نفسها مش كفاية انها تكون أرخص عربية في مصر، لأ ده لازم تكون أرخص بفارق عن نيسان صني ، ولازم الفرق يكون مغري للزبون، يعني 30 أو حتى 50 ألف مش كفاية.

👈ومتنساش جاك كمان، نازلة بـJS2 ودي في اعتقادي حتبقى بديل لسانديرو وستيب واي ، يعني بتلع في حتة لوحدها وبسعر رخيص.

👈واعتقادي كمان ان جيلي اوتوموبيليتي مش حتاخد قرار برفع سعر اميجراند إلا لمّا يكون سعر شيفروليه اوبترا قريب منها، أمّا لو نزل بفارق –وده المتوقع- مش حترفع.

👈نيسان وشيري وهيونداي مراقبين الموقف ، عروض جاهزة مستنية ضغطة زرار لو شافوا ان المبيعات قلت عن المتوسط بتاعهم.

كل دول تجميع محلي.. انت مستنى حاجة من المستورد!!

يعني تقصد الوكلاء بتوع المستورد يقفلوها يعني❓

👈محدش قال كده، بس السوق داخل في منافسة سعرية عنيفة، فالمستورد مفيش قدامه إلا انه ينزل بالسعر ، وبالتأكيد حيوصل لمدى معين ويقف ، مش حيقدر يعديه.

👈خد بالك أغلب الأوروبي كان عامل حساب اليوم ده، وتقريبا مفيش عربية اوروبية حاليا تعتبر اقتصادية (باستثناء فيات تيبو) دول بيلعبوا في فئات تانية حتكلم عليها قريب.

👈يعني محدش حيقدر ينافس من العلامات الصينية المستوردة ، ولو اتكلمنا على سوزوكي ، فعندها تحدي كبير ، لازم الوكيل ياخد سعر ممتاز من المصنع عشان ديزاير تقدر تنافس وتدخل "المعجنة" دي.

👈الفكرة كمان ان كل التوكيلات بتتكلم عن موديلاتها انها حتكسّر الدنيا ، أومال لمّا كلها يبيع فتوات ..مين اللّي هينضرب؟!

👈مش عايز أكون متشائم.. بس لمّا تعرف ان في اخبار حتطلع الفترة الجاية عن تجميع موديلات اكتر من علامات جديدة وقديمة، تسأل نفسك سؤال مهم.. هو الموديلات دي المفترض تبيع فين؟!

كإجابة سهلة .. نشوف سوق تاني .. بس حنقدر؟

#اسلام_حويلة