تسعير اكسيد وجيلي ستارراي‼ نموذج لكل عربية نازلة جديد في مصر

مسؤول في شركة صينية جمعتني معاه جلسة وسألني عن رؤيتى لسعر عربية نازلة مصر قريب بتكنولوجيا PHEV .. بلا مبالغة دخلنا في ساعة كاملة من الجدال عشان قلتله لازم تنزل عن 2 مليون جنيه، ورغم انه بقاله 5 سنين مسؤول عن السوق المصري قعد اكتر من نصهم في مصر، إلا انه مزهقش من اقناعي ان قيمتها أعلى من كده، وانتهت الجلسة وهو مش مقتنع بكلامي.

👈ناس كتير اتكلمت عن التخفيض الكبير في سعر عربيات اكسيد الصينية وان ازاي الوكيل شركة ناتكو يعمل التخفيض الضخم ده، الا لو كان بيكسب في العربية مبالغ ضخمة جدا..

👈التسعير في العالم كله مش في ايد الوكيل لوحده، في شركة أم بتدخل في كل كبيرة وصغيرة ، وبالذات مجموعة شيري بكل علاماتها، بيتدخلّوا في تفاصيل التفاصيل..

👈شركة اكسيد صممّت على موقفها ان اسعارها مفيهاش جدال أو نقاش، وكانوا شايفين نفسهم في مستوى لكزس وBMW فعلا، وعايز أقولك ان كل الشركات المصرية بلا استثناء تفاوضوا معاهم من 2021 ومحدش وافق يكون وكيل بسبب نقطة الاسعار.. أنا شخصيا من ديسمبر 2021 ولغاية اعلان ناتكو وكيل للعلامة ، يمكن عملت معاهم 11 اجتماع اون لاين سواء لعرض تكنولوجيا او شرح مواصفات الموديلات، وكل ما ياخدوا رأيي في السعر اقولهم ده مينفعش في السوق المصري نهائي.

👈ولمّا أعلنت شركة ناتكو انها بقت وكيل للعلامة وأعلنوا الاسعار، قلت بوضوح التسعير ده حق أصيل للشركة وهي وحدها حتتحمل نتيجة قرارها.

👈في اعتقادي ان ناتكو راهنت على الجودة وان عملاءها (40 سنة مرسيدس) مش حيفرق معاهم أسعار قد ما يفرق معاهم الجودة ، لكن الواقع والأرقام قال ان العملاء متقبلوش السعر بسهولة.

👈اللي حصل في تسعير اكسيد وقبلها جيلي ستارراي حيفرق جدا في اللي جاي، بمعنى انك كشركة صينية لازم تعرف ان في حد سعري لو عديته فرصك حتبقى شبه معدومة، لأنك حتدخل في مقارنة مع علامات تانية مش في صالحك خالص.

وتقريبا كل العربيات الجديدة الصيني اللّي حتنزل مصر حيبقى قدامها نموذج اكسيد وستارراي في التسعير.. لو منفعش تنزل بسعر منافس يبقى بلاش منها خالص.