جيتور X70 Plus المجمّعة محليا؟ أكيد نازلة "تقش".. إلا لو!!

كذا حد كلمنى ان كتير بينقلوا اللي بكتبه وينسبوه ليهم، ودايما ردي دي حاجة مش حقدر اوقفها ، مع الوقت الناس حتعرف مين بيكتب ومين بينقل، وفي النهاية اللي يهموني عارفين اني مصدر المعلومة فمش شاغل بالي أوي..

المهم .. تعالوا نتكلم على علامة جيتور

 وليه جيتور تحديدا؟

لأنهم حينزلوا بالعربية T1 وكمان بـX70plus المجمعة محليا في حفل واحد قبل نهاية الشهر.

سعر X70plus المستوردة الرسمي مليون و480 ألف جنيه، نشيل متوسط 20% يبقى سعر المجمّعة محليا حوالي مليون 185 ألف جنيه.. طبعا هي كانت بتنزل بفئة واحدة كاملة، مع التجميع المحلي ممكن نلاقي ثلاث فئات مبدئيا ، منهم واحدة فاضية عشان كلمة سعر يبدأ من مليون 170 ألف وتوصل أعلى فئة مليون 300 ألف جنيه.. ودي اللي عليها الكلام..وده يديها أفضلية كبيرة مع المنافسين في نفس الفئة السعرية.

إقرأ أيضا للكاتب اسلام حويلة :

تراخيص السيارات الكهربا في أبريل : سمك..لبن.. تمر هندي

منافسين زي مين؟

في اسئلة محتاجة نصيغها في شكل تاني.. عربية بالحجم ده (7 مقاعد) والانتشار ده والـ"سمعة" دي بالسعر ده.. مين حينافسها اصلا؟

قبل ما نتكلم عن المنافسين.. تعالى نتكلم عن فئة الـ7 مقاعد في السوق.. الفئة دي فيها 7 عربيات بمبيعات حوالي 700 عربية في الشهر.

مسيطر على الفئة دي شيري تيجو 8 (CKD) ووراها متسوبيشي اكسباندر.. الـX70plus المستوردة متوسط مبيعاتها تقريبا 120 عربية في الشهر، طبعا من السهل جدا لمّا تنزل محلي تضاعف الرقم ده تلات مرات ، وطبيعي حتاخد من حصص المنافسين في نفس الفئة (7 مقاعد).. وحتاخد شوية من بره.. المصريين بيحبوا الزيادة.. ممكن مش محتاج الحجم ده، بس لو بنفس السعر يبقى تمام.

إقرأ أيضا للكاتب اسلام حويلة :

 تراخيص أبريل : انخفاض في المبيعات ..نيسان على القمة وبايك في الطالع
 

واقدر اقول لك انها حتزيد 150 ألف ع الأقل خلال شهرين تلاتة من نزولها، لأنها أصلا مش حتتباع بسعرها الرسمي، إلا لو ساوايست نزلت بـ07 الموديل الشقيق ليها بسعر منافس خاصة انها حتبقى أحدث وأجمل تصميما.

طب فين الـT1 ؟

من ساعة ما نزلت T2 من سلسلة الـTومبيعاتها تقريبا 50% من مبيعات جيتور، اعتقد T1 حتوصل بالنسبة لـ75% وحتأثر كتير على داشينج

بالمناسبة.. في عربية سعرها حيزيد يوم الاحد مع طرح موديلات 2026 حقول اسمها بكرة