7 موديلات جامدة بس بداية عزالعرب بـ"اثنين".. في صحة Lynk&Co

قبل ما استعرض موديلات Lynk&Co في ناس سألت عن الاسم واختياره، الفكرة هنا في الارتباط، مفهوم الشركة ان العربية مش مجرد وسيلة انتقال بين مكان ومكان.. فكرتهم ان العربية لازم تكون مرتبطة بالحياة ، التحكم من بعد.. التحكم الصوتي والترفيه، فكرة الارتباط بالـCommunity..ده غير ان الاسم نفسه حتلاقيه مختلف عن أي علامة تانية.

طيب ايه اللّي حينزل في شهر مايو❓

الشهر الجاي عندنا حاجتين مهمين جدا حيحصلوا في سوق  العربيات ، تقدر تقول انهم حيشقلبوا السوق، واحدة منهم Lynk&Co والتانية حكتب عليها بعد بكرة.

طيب ليه Lynk&Co مهمة❓

بغض النظر عن "تقل" الوكيل عزالعرب وتاريخه، العلامة نفسها ليها من الموثوقية اللي تخليها تنتشر بشكل جيد، عربية متواجدة في اوروبا من سنين،اعتمادية شغّالة في التأجير، جزء من فولفو بيخاطب شريحة معينة، جزء من اهتمام الشريحة دي التميز، وده موجود في Lynk&Co.

إقرأ أيضا للكاتب اسلام حويلة :

كوبرا تيرامار.. آخر نسخة بنزين حتشوفها في مصر‼ الجاي كله كهربا
 

طب ايه هي موديلات Lynk&Co❓

زي ما قلت أمس عندها 7 موديلات، ولو دخلت على موقع الشركة الرسمي مش حتلاقي إلا 6 موديلات بس، لأن Lynk&Co 08 هايبريد REEV لسة حتنزل اوروبا في يونيو ودي صاحبة اكبر مدى سير في اوروبا (بنزين+بطارية) 1100 كيلومتر.

خد بالك الشركات الصينية ليها منتجات للسوق المحلي ومنتجات للتصدير، وغالبا بيكون في اختلاف في التسمية، مثلا في معرض شانغهاي بيعرضوا منتجات التصدير اول يومين وبعدها بيعرضوا عربيات السوق الصيني.

📌حسب المعلومات اللي عندي ان "عزالعرب" حتنزل عربيتين مع التقديم والباقي حينزل تباعا. واعتقد حيكون متواجد لحظة التقديم موديلين من الثلاثة دول :

إقرأ أيضا للكاتب اسلام حويلة :

تقرير تراخيص شهر مارس : طبعا في زيادة‼ وتخفيضات الأسعار "تحكم"
 

1️⃣أكبر وأفخم موديل هو Lynk&Co 09 ،بتتقدم بأكتر من نسخة، 6 مقاعد ، طولها يعدي الـ5.25 متر، مدى سير أعلى نسخة منها (بنزين+بطارية) حوالي 1450 كيلومتر في التفويلة.. بس سعرها بشكل عام في الصين يبدأ من 330 ألف يوان يعنى يبدأ من 45.2 ألف دولار.

2️⃣موديل Lynk&Co 01 اللّي من كام شهر عمل فيس ليفت ويعتبر الموديل "البكري" للعلامة.

3️⃣موديل Lynk&Co 06 الأنسب وده بينزل نسخة منه بمحرك بنزين سعة 1.5 لتر وبقوة 180 حصان وناقل حركة Dual Clutch من 7 سرعات.