كوبرا تيرامار.. آخر نسخة بنزين حتشوفها في مصر‼ الجاي كله كهربا

عندنا اكتر من عربية جديدة حتتقدم بعد العيد على طول ، العربية الأولى عندنا واللّي رسميا حتتقدم يوم 9 أبريل هي كوبرا تيرامار، وعلامة كوبرا تحديدا حاجة مختلفة، يعني دي عربيات بيركبها ناس معينة رايحين ليها، حتى المقارنة متنفعش مع أي عربية، ستايل وأداء رياضي مختلف..

تيرامار في نفس حجم فولكسفاجن تيجوان ودي آخر عربية تنزل من كوبرا بالبنزين ، الجاي بعد كده كله كهربا.

وعشان أوضحلك أكتر، كوبرا تيرامار حتتشارك في نفس المنصة مع الجيل الجديد من أودي Q3، يعني المواد المستخدمة حتبقى واحدة، يعني نفس جودة أودي مع أداء رياضي خاص، بتحرص مجموعة فولكسفاجن انه يميز عربيات كوبرا عن باقي موديلات المجموعة.

اسم تيرامار جه من حلبة سباق سيتجيس-تيرامار التاريخية في برشلونة، واللّي شهدت الإعلان عن علامة كوبرا في 2018، ومن التاريخ ده لغاية نهاية 2024 باعت كوبرا اكتر من 700 ألف عربية حول العالم.

لمّا سألوا أليخاندرو ميسونيرو رومانوس مصمّم كوبرا عن الفرق بين قيادة كوبرا وأي عربية تانية أخرى، هل مجرد السرعة؟

رد وقال ، الأمر بيتعدى مجرد القيادة بسرعة عالية.. الصوت، والمواد المستخدمة جوه العربية ، وحتى الرائحة.. في عربيات الأداء العالي، كل حاجة بتجذب الحواس. في جاذبية بصرية، فلازم نركز على المظهر.. خفة الحركة.. عناصر متعددة مصنوعة من ألياف الكربون، لكن الأمر بيتعدى مجرد لصق بعض أجزاء ألياف الكربون .. خفة وزن المواد بشكل عام هي العامل الأساسي ، كل ده جزء من هدفنا في جعلها تعمل بكفاءة عالية، باستخدام مواد وأقمشة جميلة مع الحفاظ على البساطة و الأصالة.

في رأيي ان كوبرا بالنسبة لمجموعة فولكسفاجن زي بالظبط موديلات M بالنسبة لـBMW، متقدمة لفئة محددة ومحدودة عايزة أداء وستايل وشياكة تميّز مالكها

حتقولي في عربيات أدائها أعلى ، صحيح

حتقولي في تصميمات أحلى.. صحيح

بس الفكرة هنا انك بتاخد باكدج على بعضه، أداء وتصميم وجودة وراحة، باقة بتتقدم على بعضها فتاخدها زي ماهي

بالمناسبة.. تيرامار بتتقدم بمحركين بنزين واحد سعة 1.5 لتر والتاني 2 لتر ، دي غير الهايبريد.. كلها أيام ونعرف التفاصيل