شريحة عربيات تحت المليون جنيه تكسب ولا اللّي فوق المليون؟

في 2024 تم ترخيص عدد 99 علامة للسيارات الملاكي في السوق المصري ، الـ99 علامة منهم 430 موديل، فيهم 10 علامات بس بيستحوذوا على 66% من مبيعات السوق. (ترتيب العلامات حتلاقيهم في جدول تحت).

عندنا 15 موديل (منهم 5 تجميع محلي) تحت المليون جنيه (من430 موديل)، مبيعاتهم مجتمعة حوالي 17% من السوق (استبعدت الـ AD وتيجو7 وسينترا لأن اسعارهم تبدا أقل من مليون بكلام فاضي)، خرج من السوق في 2025 موديل F3 في المقابل دخل موديلين تجميع محلي تحت المليون حتى الآن وهم شيفروليه اوبترا وجيلي امجراند، أمّا بروتون ساجا فكانت موجودة مستوردة.

إقرأ أيضا للكاتب إسلام حويلة :

الـ10 موديلات الأكثر ترخيصا في فبراير.. و Avatr اللّي حياخدها حيكسب كتير
 

دايما في فئات الموديل ،الأكثر مبيعا هي أعلى فئة.. وغالبا لو سألت عن أول فئة مش حتلاقيها متوفرة عند الوكلاء.. لأن الطلب عليها شبه منعدم ، بس موجودة في قائمة الأسعار عشان الاستفادة من كلمة "أسعار تبدأ من"

لو افترضنا ان الزيادة في شريحة العملا دي في 2025 حتكون 20%، يعني متوقع مبيعات تحت المليون جنيه تقفل 30 ألف عربية في 2025.

يعني كل شهر 2500 عربية.. صني لوحدها رخّصت في يناير 1,348 وحدة وفي فبراير 1,204 وحدة ، تقريبا نص الرقم ، ولسّة عندنا اكسنت RB واريزو5 وتيجو 4 وساجا واوبترا وامجراند.. وكلها اسابيع ونشوف جاك  S2ده كله تجميع محلي، لسة المستورد.

وبالتالي الطبيعي نلاقي ان الزيادة في الشريحة دي تعدي الـ40% ع الأقل مش الـ20%.. المنطقي تكون مبيعات الفئة دي في الشهر يا دوب 5000 وحدة،ع الأقل عشان الـ6 موديلات المحلية الباقية يحققوا متوسط 417 وحدة شهريا، وياخدوا الحوافز.

إقرأ أيضا للكاتب إسلام حويلة :

جنون عمولات البنوك عند الموزعين والتجّار‼ طالما حتشتري يبقى "فاصل" في السعر
 

بس برضه لمّا نشوف 2024 حنلاقي ان القوة الشرائية الأكبر والأقوى في عربيات فوق المليون و100 ألف لغاية الـ2.5 مليون جنيه.. ودي شريحة حتبقى "ضرب نار" وتحديدا بداية من نص مايو.. ودي شريحة التوقعات بتقول حتزيد 20%.

السؤال هنا .. هل شريحة عربيات تحت المليون جنيه تستوعب الزيادة دي ولا حتاخد عملا من الشريحة الأكبر؟ والعكس هل الشريحة الأكبر حتاخد من الشريحة الأقل؟

ولا السوق حيزيد بمتوسط 30 % وده رقم محدش في السوق جه ناحيته خالص؟