جنون عمولات البنوك عند الموزعين والتجّار‼ طالما حتشتري يبقى "فاصل" في السعر

نسبة بيع العربيات بالتقسيط إلى الكاش 70-30 ، اي تاجر أو موزع حاليا كل تركيزه البيع بالتقسيط، عشان كده حتلاقي اتفاقيات خاصة بين البنوك والتجار على بعض العلامات ، بيبقى عرض خاص بالموزع، لكن لو موزع تاني اتكلم مع البنك بياخد نفس العرض.

طب ليه التجار عايزين يبيعوا كل عربياتهم بالتقسيط❓

👈عشان العمولات طبعا، البنوك كلها فاتحة برامج تمويل العربيات لكل الموزعين والتجّار، وكل ما بعت أكتر تزيد عمولتك عند البنك، وعمولة البنك مش قليلة ، بتوصل لـ10% .

انت عايز تعرف حرق العربيات جه منين❓ أقولك عامل مهم👇👇

كان زمان والسوق ماشي التاجر يبيع العربية يكسب نسبته الطبيعية وياخد عمولة من البنك، لمّا الدنيا "زنّقت" بقى ينزل من مكسبه في العربية شوية، لو بيكسب 40 ألف جنيه ، يعمل عرض ويشيل 20 ألف من سعرها.

لمّا الدنيا "زنّقت" أكتر بقى يسيب مكسبه كله ويعمل خصم 40 ألف جنيه ويكتفى بعمولة البنك ، ولمّا السوق "وقف"، قالك مش كفاية اني اسيب مكسبي في العربية، ده أنا كمان حسيب جزء من عمولة البنك ووصل لغاية نص العمولة كمان.

إقرأ أيضا للكاتب اسلام حويلة :

هل تسبب الأوفر برايس على السيارات في تغيير قرار الشراء؟

👈البنوك طمعت في القصة ، بقت عاملة نظام شرايح، تبيع 500 عربية في الشهر تاخد عمولة 10% ، تبيع 400 تاخد 8% وهكذا.. وفي نفس الوقت التجّار قالوا التدوير السريع لرأس المال بمكسب قليل أحسن وأهم، وهوب بدأت قصة "الحرق" اللي شغّالة اليومين دول.

ايه ده ..يعني التجّار بتكسب أهو❓

خدها قاعدة.. مفيش تاجر بيخسر، كان قفلها من زمان، هو يقولك بخسر في العربية، وده صحيح ، لكن بيعوض خسارته من حتة تانية وبيكسب كمان... وفي تجّار بتحسبها بالفرصة البديلة ‼يعني كان عنده فرصة يكسب 50 ألف جنيه لكن هو كسب 30 ألف بس، فهو كده خسر 20 ألف كان ممكن يكسبهم.

إقرأ أيضا للكاتب اسلام حويلة :

الـ10 موديلات الأكثر ترخيصا في فبراير.. و Avatr اللّي حياخدها حيكسب كتير
 

كويس ايه بقى المطلوب منى كعميل❓

المطلوب منك "تفاصل" في السعر.. ايوة تفاصل ولو مش عاجبك شوف معرض تاني وتالت وعاشر، انت أولى بأي فرق سعر

بالمناسبة.. توكيل NIO اقترب كتير من شركة كبرى ودي علامة عندها موديل اسمه ET7 صاحب اكبر مدى سير حتى الآن 1050 كم ، شيل منه 200 كم ع الواقع.. يعني تروح الجونة مستريح