اسلام حويلة يكتب :

الـ10 موديلات الأكثر ترخيصا في فبراير.. و Avatr اللّي حياخدها حيكسب كتير

Avatr 12

امس اتكلمت عن زيادة حجم الفئة الاقتصادية بشكل ملحوظ، والنهاردة قلت نشوف مع بعض شوية أرقام تؤكد اللّي قلته..

لو استعرضنا أكثر 10 موديلات اترخّصوا في شهر فبراير حنلاقي ان هيونداي AD في المركزالثاني وبعدها هيونداي توسان والرابع هيونداي أكسنت RB والخامس فولكسفاجن تيجوان والسادس شيري تيجو4 برو والسابع شيري أريزو5 والثامن شيري تيجو7 والتاسع MG ZS والعاشر فيات تيبو.. (واخد بالك مجموعة غبور ليها 6 موديلات لوحدها)

خرج من القايمة دي مرسيدس C كلاس وسكودا كودياك وتويوتا كورولا

إقرأ أيضا للكاتب إسلام حويلة :

هل تسبب الأوفر برايس على السيارات في تغيير قرار الشراء؟

اومال فين المركز الأول؟

👈نيسان صني طبعا ..مش محتاجة يعني

👈كمان مهم تعرف ان أغلب العربيات البيّاعة تراخيصها قلت في فبرايرعن يناير ، زي سبورتاج وMG-RX5 ورينو اوسترال وميتسوبيشي اكليبس ونيسان قشقاي، وتقريبا مزادش في التراخيص غير بيجو 3008 وكل موديلات جيتور و GAC وبايك BJ30 و MG One.

طب أخبار تراخيص "الفواخر" ايه؟

الكبار نزلوا.. مرسيدس و BMW وأودي وفولفو.. بورشة زادت (53 عربية) وجيب زادت (53 عربية).

طبعا منقدرش نقيس على شهر واحد، لكن دي ملاحظة ونشوف هل حتتكرر الشهور الجاية ولا لأ؟

إقرأ أيضا للكاتب إسلام حويلة :

هو ليه شيري و MG"راكبين" السوق مع وجود اكتر من 10 علامات صينية؟

طيب تعالى ننقل لنقطة تانية خالص.. في علامة كهرباء فاخرة جدا، Avatr أونقولها بالدارج "أفاتار"

العلامة دي بينزل منها موديلين اثنين بس 11و12.. آخر مرة سألت عن سعرها في ديسمبر الماضي كان موديل 12 بـ60 ألف دولار، ودي فرع الكهربا الفاخر من شانجان، شانجان عندها برضه علامة ديبال الكهربا بس مش بقيمة ولا جودة Avatr.

المهم العلامة دي رخّصت في ديسمبر 12 عربية وفي يناير 11 وفي فبراير 14 عربية، خد بالك دي بتيجي استيراد، ولا ليها أي دعاية ولا يحزنون.. غالبا اللي بيركبها بيشتريها على طول.. خد تفصيلة واحدة قاعدة العجلات اكتر من 3 متر.. متخيل الوسع والرحابة في العربية

بالمناسبة.. Avatr لسة متحددش وكيلها في مصر، في كذا شركة في إطار المفاوضات حاليا.. والمنطق يقول ان العلامة دي اللّي حياخدها حتفرق معاه كتير