اسلام حويلة يكتب : فرصة لتجميع "Rox" في مصر..نمسك فيها بقى ونصّدر بجد

خلال التدشين الرسمي لعلامة Rox في مصر دار حوار بيني وبين السيد جارفيس يان الشريك المؤسس والرئيس التنفيذي لشركة Rox Motor بحضور المهندس نور الدين الشريف وكيل العلامة في مصر.

سألته عن مبيعات Rox في الصين قالي ان المنافسة في الصين عنيفة جدا وهمّا مركزين على التصدير، وعن مبيعات العلامة في الخليج، قالي انهم حققوا مبيعات ألف عربية ، وانهم مستهدفين من 5 الى 6 آلاف وحدة في 2025، وانهم بيعولوا على السوق المصري بشكل كبير في تحقيق المبيعات.

وقالي ان السعر اللّي أخده الوكيل شركة نور الدين الشريف مفيش وكيل تاني قدر ياخده ، ولمّا سألته حنشوف امتى موديل تاني من علامة Rox ابتسم وقالي مش حقدر اجاوبك بس قريب حتسمع أخبار جيدة عن الشركة.

كمان السيد ديفيد وو رئيس العمليات بالشركة اتكلم عن السوق المصري بايجابية شديدة وان طموحهم كبير في تحقيق مبيعات غير متوقعة، وده يخلينا نشوف أد ايه الشركات الصينية شايفه السوق المصري واعد وان التواجد فيه ليه أولوية ، وانها مسألة وقت وحينطلق بسرعة كبيرة جدا.

طيب، نرجع شوية لورا، لمّا تم تدشين Rox في السعودية، السيد جارفيس قال انهم بيفكروا بشكل جدي في انشاء مصنع لـ Roxهناك بالشراكة مع استثمارات سعودية، يكون الغرض من المصنع امداد الشرق الأوسط وأفريقيا بعربيات Rox.

لكن اللي لمسته من قيادات الشركة، ان مصر بالنسبة ليهم حاجة كبيرة أوي، هنا محتاجين دور من الدولة لدعم الوكيل وجذب الشركة لانشاء مصنع في مصر .

وكلاء علامة Rox في الخليج أبدوا اعتراضهم على سعر العربية في مصر، باعتبار أقل من سعرهم ، وطالبوا الشركة انهم ياخدوا بنفس أسعار الوكيل المصري.

بالمناسبة.. عندي خلاف دائم مع الوكلاء في مصر، دايما لمّا ييجي ضيف من الشركة الأم ويحضر مؤتمر بتلاقي حصار من قيادات الوكيل على الضيف ، ولو حصل وصحفي وقف معاه بتلاقي في لحظات حشد طلع من كل حتة واقفين بينه وبين الصحفي و "يغلوشوا" على الحوار وياخدوه بعيد.

ولمّا بعاتب الشركات ، وليه ميتعملش معاهم لقاءات ، بتكون الإجابة المحفوظة.. ده جاي من المطار وحيحضر كام ساعة وراجع ع المطار تاني.

طبعا انا وهما وكل القطاع فاهمين ان ده كلام "فشنك".. عادتنا ولا حنشتريها.