تراخيص يناير: نيسان صني.. اللّي يحضّر العفريت "يصرفه" ‼️وبروتون ساجا سعرها في كلام

واضح ان الجماعة بتوع نيسان مصر معجبهومش المقارنات بين الـ"صني" والعربيات الجديدة اللّي نزلت واللي لسة حتنزل، ودخلوا ع السوق هات يا ضرب ، أيوة ضرب🤕 مفيش شتيمة

نيسان محققة في يناير أعلى مبيعات من شهور طويلة جدا، باعت 1777 عربية أغلبهم صني ، وأصلا كانت في ديسمبر عاملة "ريكورد" مبيعات بس قالت، محدش يكسره غيري، لأ وكمان السوق كله نازل وهي طالعة.. "اللي يحضر العفريت يصرفه".. انا بتكلم عن تراخيص المرور مش أرقام الـ"أميك".

باقي العلامات آداءها طبيعي وهبوط المبيعات تقريبا بنفس نسبة هبوط السوق ، مرحناش بعيد .. طبعا حتناول التقرير بالتفصيل تباعا.. لكن في نقطة متعلقة بنيسان صني ، وهي بروتون ساجا.

إقرأ أيضا للكاتب إسلام حويلة : 

3 عوامل أساسية لنجاح أي عربية في مصر.. Rox 01 حققت اثنين بس
 

بروتون ساجا اللي نازلة بشكل رسمي يوم 26 فبراير⁉️

هي بروتون ساجا بس انا مقولتش نازلة امتى😎

👈المهم تقريبا كل الكلام عن بروتون انها لازم تنزل بسعر أقل بكتير من نيسان صني.

طب ليه صني تحديدا يعني⁉️

ما تشوف الرقم يا بنى آدم ، بقولك معدية الـ1600 عربية في يناير ، حنقارن بمين يعني‼️

إقرأ أيضا للكاتب إسلام حويلة : 

نيسان ماجنايت نازلة بـ30 فئة ‼وتجربة قيادة محترمة لـ"نافارا"
 

👈مهما العميل -في الشريحة دي- شاف واتفرج على موديلات وأخد نصايح كتير من قرايبه وزمايله واصدقاؤه، لكن الوضع بيختلف خالص مع دفع الفلوس ، العميل – في الشريحة دي تحديدا- يقولك خليني في المضمون.. سعر اعادة بيع، قطع غيار متوفرة ورخيصة.. الباقي شكليات، ده عميل دافع دم قلبه مقدم والباقي قسط ، نفسه يغامر،بس لحظة الدفع .."يغامر دي تبقى......"⛔️

استنى  ..هو ممكن يغامر بس لازم سبب مقنع.. ده محتاج فرق سعر كبير على اللي بيدفعه مش اللي بيسمعه، يعني حدفع مقدم كام في دي أو دي، مش فارق السعر بين الاثنين كام☑️

طبعا انا مش مقتنع ان بروتون ساجا تنزل 🔥بـ599990 جنيه🔥، بس مقتنع لو نزلت بأكتر من كده حتلاقي صعوبات في تحقيق حجم مبيعات كبير ،كده كده حتبيع، بس التجميع المحلي محتاج ارقام كبيرة ، في أسوأ الأحوال مش أقل من 300 عربية في الشهر