نيسان ماجنايت نازلة بـ30 فئة ‼وتجربة قيادة محترمة لـ"نافارا"

في بوست بيقول ان نيسان مصر حتجمّع موديل ماجنايت وحينزل بسعر 560 ألف جنيه، معنديش مشكلة مع اللّي كتب البوست، لأنه فاهم كويس انه "هجص" والغرض منه يا إمّا "لايكات" يا إمّا ضرب تحت الحزام بدري بدري.

المهم قلت اعمل سيرش فلقيت حاجة غريبة جدا..

نيسان ماجنايت بتتقدم في السوق الهندي في 30 فئة ‼أيوة 30 فئة‼

مبدئيا في 6 فئات رئيسية ، وكل فئة منها مانيوال ومنها اوتوماتيك، وبرضه كل فئة فيها لون واحد وفي لونين Dual Tone.. تمام كده

لأ صحصح كده وركّز .. ماهو برضه الموتور فيه منه عادي وفي توربو

استنى بس رايح فين

ماهو في فتيس اوتوماتيك عادي وفي فتيس CVT سعادتك🧐

ومستغربين لمّا مجموعة غبور تقدّم هيونداي توسان في 5 أو6 فئات

ما علينا

النهاردة نيسان مصر نظمت تجربة قيادة لـ"نافارا"، وكانت تجربة جيدة جيدا خصوصا مع "التراك" اللّي اتعمل عشان يبّين قدرات العربية وقوتها في التعامل مع مختلف الطرق سواء الـ 4X4 أو الـ 4X2.
    
 

التراك فكرني باختبارات جيب اللّي كنا بنعملها كل سنة ومع كل موديل ينزل مصر ، ازاي العربية تتعامل مع الصخور وفي الطين والرمل وبزاوية 45درجة وباقي الاختبارات اللّي بتثبت ان نظام الدفع الرباعي في نافارا "عفي" فعلا.

طبعا أسئلة زي جودة السولار وكفاءة العربية بعد سنين من الاستخدام، كان الجواب عليها من قيادات نيسان ، ان نافارا بقالها سنين في أفريقيا ومنها دول فيها الوقود أقل جودة بكتير من مصر وكمان الطرق في بعض الدول في منتهى الصعوبة ورغم ده العربية بقالها سنين وسنين.

سعر نيسان نافارا الجديدة

العربية بتتقدم في 5 فئات، الاولى سنجل كابين مانيوال بمليون و350 ألف جنيه
والـ4 فئات الباقية دوبل كابين أوتوماتيك بس بتتباع منطقة حرة بالدولار اسعارها كالتالي :
22000 دولار  - 24000 – 27000 – 29200 دولار    

العربية بتنزل بضمان 5 سنين أو 150 ألف كيلومتر و5 سنين مساعدة على الطريق مجانا