سعر العربية التجميع المحلي يقل 20% عن المستوردة.. أوتوموبيليتي عملت كده ‼

👈أحد المتابعين الكرام السيد "أمير أمير" لفت نظري لنقطة مهمة ، ويمكن تكون مرجع مهم للتجميع المحلي في مصر، جيلي كول راي المجمعة محليا اتقدمت للسوق في 3 فئات وبأسعار أقل من المستوردة بمتوسط 20%.

👈معنى كده ان الفرق في أي تجميع محلي بنفس الظروف (سعر الدولار والجمارك والضريبة والرسوم) لازم يكون في نفس الحدود دي ، يعني اللي يسري على "جيلي كول راي" يسري على أي عربية من آسيا وأمريكا شمالية او جنوبية ، اوروبا كلنا عارفين انها زيرو جمارك.

👈وبالتالي ناخد بروتون ساجا كمثال لان منها المستوردة واللي سعرها 750 ألف جنيه، وفي حال التجميع المحلي من المفترض سعرها يكون 600 ألف جنيه لو قللّنا الـ20% من سعرها.. وعلى نفس المنوال كل العربيات.

إقرأ أيضا للكاتب اسلام حويلة :

أخيرا أسعار العربيات حتنزل.. بركاتك يا 2025 وجاك JS2 المجمعة محليا في أبريل
 

طب ما هو اتشال من عليها 40% جمارك❓

👈يا سلام عليك .. بلاص مفهومية.. ماهو 20% من اجمالي السعر اكتر من 50%جمارك مش 40 بس ، لأن الجمارك ولو كانت نسبة كبيرة ، ففي عوامل تانية كتير تدخل في التسعير.. مش وقته شرحها.

👈بس في نقطة مهمة، ممكن ووارد وبتحصل ان مستثمر يقلل من السعر الطبيعي لفترة عشان يدي ميزة اضافية للمنتج عشان يبيع وينتشر ، وممكن يعتبرها جزء من الاستثمار مثلا، انك تخسر شوية في الأول وانت واثق انك بتقدم منتج جيد يكسب ثقة الناس، وبعدين تبدأ تكسب.

👈انت متخيل نسبة 20% مع كم العربيات المحلية اللّي نازلة ممكن تعمل ايه في السوق❓

👈حتقولي في فروقات كبيرة وحجم استثمارات مختلف ، وفايدة بنوك.. على راسي.. بس انا كمستهلك شايف ان في عربية قعدت اكتر من سنة مستوردة بسعر ولمّا اتجمعت محلي نزل سعرها 20% .. بس كده

إقرأ أيضا للكاتب اسلام حويلة :

الأموال الساخنة بـ"تخلع" من العربيات.. وحرق الأسعار حيبقى ع المكشوف
 

👈بالمناسبة.. العربية اللي بجربها من العربيات اللي بحبها، شياكة وهيبة وحاجة م الآخر ..كنت ناوي اقول عليها بس لقيت العلامة مش باينة فقلت اسالكم.. بس زمايلنا يمتنعوا عن الإجابة‼

🔥ايه هي العربية❓🔥