اسلام حويلة يكتب :

أخيرا أسعار العربيات حتنزل.. بركاتك يا 2025 وجاك JS2 المجمعة محليا في أبريل

جاك JS2

في موضوعين مهمين اتكلم فيهم، الأول موضوع الموزعين ومشكلتهم مع الوكلاء،لأن الموضوع "ريحته فاحت" زي ما بيقولوا، والثاني أسعار العربيات خلال الفترة الجاية

👈نبدأ بالاسعار ، دايما لمّا بتسأل أسعار العربيات حتنزل ❓ كان ردّي وهو أسعار منتجات إيه نزلت عشان أسعار العربيات تنزل‼

بس استنى شوية رايح فين.. شكلها "خلاص تنزل المرادي" بصوت عبدالفتاح القصري

تنزل ايه يا مولانا❓ انت حتعمل "صياح" ع فيسبوك زي "البعدا"❓

إقرأ أيضا للكاتب اسلام حويلة :

انك لـ"ميت" وانهم لـ"ميتون" شعار الشركات في 2025..وبروتون ساجا بـ650 ألف جنيه

عيب عليك دي كلمة "صياح فيسبوك" انا اللّي مطلعها أصلا .. تعالى ناخدها واحدة واحدة واحكم انت بنفسك..

👈أولا : فايدة البنك وحسب المصرفيين والاقتصاديين حتنزل 2% مرة واحدة في اجتماع لجنة السياسات النقدية الجاي.

👈ثانيا : الهدنة واتفاق وقف اطلاق النار بخصوص غزة حيعمل استقرار كبير في البحر الأحمر وحتبدأ الخطوط الملاحية ترجع لطبيعتها.. والـ8 مليار دولار اللّي ضاعوا على قناة السويس في 2024 حيرجعوا في 2025.

👈ثالثا : الاسثمارات الّلي تم ضخها لازم تقولك ان لازم يحصل بيع للعربيات، وبكميات كبيرة ، وان المنافسة مش حترحم حد، وبالتالي حتلاقي عروض نازلة ترف عليك خلال الفترة الجاية.

كل اللّي فات يعمل إيه في السوق❓

إقرأ أيضا للكاتب اسلام حويلة :

هل الوكلاء حيقدروا يوصلوا للأرقام دي في 2025 ؟ .. وسوزوكي سويفت الجديدة ع الباب

1️⃣ : تكلفة الشحن حتنزل النص ع الأقل والوقت كذلك (دورة رأس المال) (عامل مهم في التسعير حينزل)

2️⃣ : الفايدة حتنزل 2% الشهر الجاي يعني كل الشركات اللي شغّالة بفلوس بنوك الفايدة حتقل عليها(عامل مهم في التسعير حينزل) وكمان حتحصل انفراجة نسبية في مبيعات التقسيط، خد بالك الكلام انها حتنزل 6% خلال 2025.

3️⃣: في عربيات لازم تبيع، ذوق عافية لازم تبيع، في عدة مئات ملايين دولار استثمارات اتدفعت ، ووسط العربيات الكتير والمنافسة معندكش حل إلا انك تتنازل عن جزء من أرباحك وأرباح الموزع (عامل مهم في التسعير حينزل).. معملتش؟ في غيرك حيعمل.

يعني الأسعار ممكن تنزل فعلا❓

لو محصلش حاجة ترفع الدولار أو تقفل الاستيراد.. لازم ولابد الاسعار تنزل،واللّي مش حيعمل كده حيخسر مبيعات مستهدفة.

بالمناسبة.. مجموعة القصراوي حتقدم جاك JS2 المجمعة محليا في أبريل الجاي بعد العيد.. العربية دي حتلعب في حتة لوحدها،أهو دي اللي ممكن سعرها يقل عن 650 ألف جنيه