"العتاولة" زادوا واحد .. شيفروليه أوبترا.. خلّي اللعب يحلو

يوم 27 يناير الجاي جنرال موتورز مصر والمنصور للسيارات حيقدموا شيفروليه اوبترا المجمعة محليا بشكل رسمي، بعد ما كشفوا عنها جزئيا في الاحتفال بتصنيع مليون عربية في مصنع جنرال موتورز.

*شيفروليه أوبترا ليها تاريخ طويل في مصر،وكل جيل كان يحقق مبيعات كبيرة، وحتى الجيل الثالث اللي حيتقدم برضه حيقق مبيعات كبيرة.

ايه ده انت يعني مغسّل وضامن جنة؟

*يا راجل يعني هو المنصور للسيارات بعد اكتر من 45 سنة في سوق السيارات مش حيعرف يبيع 3 او 4 آلاف عربية منها في السنة؟

*كتبت في يوليو الماضي ان اوبترا من العربيات اللي حققت انتشار كبير جدا في مصر، وسابت فراغ كبير في الفئة بتاعتها، خاصة ان حجمها كان اكبر بشكل ملحوظ من بقية الموديلات في فئتها، ودي كانت ميزة لها عن باقي المنافسين.

*الكويس ان العربية دي او الجيل ده تم انتاجه في 2023 يعني لولا بعض الاضطرابات اللي شهدها سوق السيارات كان ح يتم انتاجها بالتزامن مع الانتاج العالمي.

*نرجع تاني لاوبترا الجديدة اللي مفيش تفاصيل رسمية عنها لغاية الوقتي، لكن هي بتنزل في الاسواق الخارجية بمحرك 1.5 لتر وناقل حركة مانيوال واوتوماتيك CVT مع تجهيزات أمان قياسية نقدر نتوقعها من وسائد هوائية وانظمة الـABS,EBD,ESP,HSA وحساسات ركن خلفية.

*وبكرر.. عربيات كتير ممكن تتقدم في السوق، لكن عربيات قليلة هي اللي بتحقق انتشار ونجاح، وغالبا بيبقى ورا النجاح ده وكيل كبير.. يعني تقدر تقول ان "عتاولة" السوق زادوا واحد

نسأل السؤال المعتاد.. تفتكروا السعر كام ؟