امجراند.. الاختبار الحقيقي لـ"جيلي" في مصر.. تفتكروا سعرها كام؟

الجيل الرابع من جيلي امجراند حيتقدم بكرة في مصر، ودي أهم عربية في مجموعةجيلي كلها ، لأنها ببساطة الأفضل مبيعا حول العالم، أكثر من 4 ملايين نسخة اتباعت في الصين وخارجها، وكان الغريب فعلا ان العربية رغم اطلاقها عالميا في 2021 وتواججدها في أسواق الخليج من سنتين، إلا ان وكيلين جيلي في مصر محدش فيهم قدّمها مع باقي الموديلات ، والاحتمال الوحيد ان ادارة جيلي نفسها قررت عدم نزولها إلا لمّا تتجمع محليا.

طبعا شركة اولاد الغانم همّا وكيل جيلي في دولة الكويت ، وهمّا برضه الشريك الرئيسي في اوتوموبيليتي، ويمكن ده يكون السبب في قرار تجميع العربية على طول بدون تقديمها الأول، اكيد همّا عارفين العربية كويس وآداءها وعشان كده بدأوا على طول في تجميعها.

انت ليه بتقول انها الاختبار الحقيقي لجيلي؟

لأني شايف ان كل موديلات جيلي اللّي فاتت محققتش النجاح المنتظر، يمكن باستثناء GX3 وقت ما كان سعرها مناسب، ولمّا زاد السعر بقت بره "حسبة المنافسة".

حتقولي كول راي مثلا، حقولك انها واحدة من أفضل وأنسب العربيات الـ SUV اللي نزلت مصر ، لكنها لا اتقدمت كعربية جديدة تليق بحجمها، ولا اتعملها دعاية تستحقها.

شوف شركة جيلي وموديلاتها كلها " Perfect"ولمّا بتدخل سوق لازم تبقى من الكبار فيه، يمكن مشكلة السوق المصري عدم تقبل أسعارهم ، رغم ان عربيات جيلي لو في أي مقارنة تكسب مرتاح.. بس يفضل السعر اللّي متمسكة بيه جيلي نفسها واللي دايما حيكون أغلى من أي منافس هو العقبة أمام انتشار موديلاتها في مصر.

طيب معنى كده ان امجراند حتنزل بسعر زيادة عن المتوقع؟

أعتقد الوضع محتلف.. فيه استثمارات وتجميع "وليلة" كبيرة سعادتك، فلازم يكون للمستثمر "اوتوموبيليتي" مشاركة فاعلة في القرار، ماهو مش حدفع واستثمر وتقولي بيعها بسعر غير منافس.

هات م الآخر.. سعرها كام؟

بكرة حنسمع ونعرف الأسعار والفئات، بس في مدى سعري لا حتنزل عنه ولا حتزيد عنه، لمّا نعرف ان المنافس الأساسي في مصر هيونداي AD سعرها يبدأ من 990 ألف جنيه ، يبقى الطبيعي انها تبدأ بـ900 ألف جنيه لغاية مليون و100 ألف جنيه.

 انتوا رايكم السعر ممكن يكون في حدود كام؟