انك لـ"ميت" وانهم لـ"ميتون" شعار الشركات في 2025..وبروتون ساجا بـ650 ألف جنيه

تراخيص الملاكي زادت في ديسمبر عن نوفمبر 2789 عربية ، يعني حوالي 21.5%، وتقربيا دي الزيادة اللي أنا متوقعها (25%) 🧐خلال سنة 2025.. فتعالوا نشوف ايه العلامات اللي استفادت من زيادة حجم السوق في شهر ديسمبر.. وبرضه اكرر كلامي، ده بناء على أرقام تقرير تراخيص المرور الرسمية.

👈علامات MG ونيسان و BMWالأكثر استفادة من زيادة السوق بالترتيب اللأولى زادت 621 وحدة ونيسان زادت 529 وحدة و BMW زادت 386 وحدة، يعني الثلاثة علامات استحوذوا على 55% من زيادة السوق📛

👈برضه مهم نقول ان علامة بتبيع اصلا 1500 وحدة فطبيعي ان زيادتها حتكون محدودة.

👈أغلب العلامات الأوروبية زادت تراخيصها 50% وانت طالع📈  على رأسهم BMW زادت بنسبة 163% وستروين بنسبة 120% واوبل بنسبة 85%.. أودي شهدت تراجع بنسبة 68% وفولكس فاجن حوالي 32%.. خد بالك كلمة تقريبا عشان محدش يقولي أصل فيراري ومازيراتي تراجعوا.. وكانت نسبة استحواذهم 40% من زيادة السوق.. وتحديدا علامات BMW ورينو وفيات وسيات وبيجو واوبل وستروين.

طبعا اي علامة كانت الزيادة او النقصان في حدود 15% فده أمر طبيعي.

بس انت قلت 55% و40% يعني باقي العلامات نزلت؟

لأ طبعا ⛔، في علامات نزلت مقابل علامات طلعت، دي بتشيل دي، العلامات المذكورة واللي ذكرتها اليومين اللي فاتوا زي تويوتا وجيتور ،همّا العلامات اللّي شهدت زيادات ملحوظة.

هل ده معناه ان زيادة حجم السوق في 2025 حيمشي بنفس وتيرة زيادة ديسمبر 2024 ؟

👈ده سؤال صعب جدا، السوق حيبان اكتر وبوضوح في يناير وفبراير، لسببين في رأيي، الأول المخزون من عربيات الاستيراد الشخصي حيشح جدا، وبالتالي تظهر القدرات الحقيقية للعلامات ،وتاني حاجة ان الاسعار زادت في يناير، وناس كتير اندفعت للشراء في ديسمبر قبل العربيات ما تغلى.

لمّا بتسمع من الوكلاء والموزعين والتجار عن سنة 2025 تحس ان كل الشركات داخلين سنة 2025 دخلة انك لـ"ميت" وانهم لـ"ميتون"‼ فتعرف ان المنافسة مش حترحم حد، ونصيحة لشركات كتير.. "غيّر عتبتك" عشان تعرف تنافس.

🔥بالمناسبة .. الكلام عن بروتون ساجا انها نازلة بفئة وحيدة Fully Loaded بـ650 ألف جنيه 🔥