منافسة ايه .. ان كان موزعين دول همّا موزعين "دوكهم" !!

زي ما عارفين في موديلات جديدة كتير تجميع محلي حتنزل تباعا خلال 2025، والمنافسة حتكون عنيفة، نيجي بقى لدور الموزعين في ترجيح كفة علامة عن التانية.

تقدر تقول ان 50% من المشترين بيروحوا صالات العرض وعندهم "سنة" تردد والأكثرية بتكون محتارة فعلا بين موديلين أو ثلاثة، مذاكرينهم كويس وعارفين كل كبيرة وصغيرة فيهم، فهنا ييجي دور موظف المبيعات في صالة العرض، انا بتكلم عن موزعين وتجار مش صالات عرض وكلاء.

"البيّاع" هنا دوره انه يوجه العميل المحتار ده لموديل معين أو ياخده لموديل تاني خالص، وغالبا "البيّاع" بيعمل ده حسب توجيهات الموزع، اللّي تعليماته حسب "مارجن الربح" في كل عربية، يعني العربية اللي حيكسب فيها 100 ألف مش زي اللي حيكسب منها 50 الف بس.

وفي عربيات "ركنتها" بتجيب فلوس وليها مشترين وعليها اوفر برايس، فميجراش حاجة لمّا تركن شوية ويبيع موديلات تانية فيها "فكّة" كتير، وده مش سر ولا حاجة، دي اساسيات شغل الموزعين والتجّار.

طاه ما موزعين دول همّا موزعين دوكهم؟

هنا أساس الموضوع، همّا همّا الموزعين بتوع العلامات المختلفة والمتنافسة، لكن مين الوكيل اللّي حيتعامل معاهم بشكل مختلف و يعتبرهم شركاء ليه فعليا مش كلام مؤتمرات؟

حتلاقي الفترة الجاية الوكلاء حيسيبوا هوامش ربح أعلى للموزعين، وممكن يتعمل بونص لتحقيق التارجت بجانب شوية "دلع" ليهم، ليه؟ في اعتقادي الفترة الجاية حيختفي الأوفربرايس أو حيقل لدرجة لا تذكر، وبالتالي مصلحة الموزع انه "يشّغل" العربيات اللي حيكسب منها "أوي"، مش اللي يكسب منها وبس ،وكمان ارتفاع الأسعار بيقلّل من حجم الشراء.

ايه ده هو الأسعار لسة حتغلى تاني؟

حتقولي خليها تصدي وحكاوي  القهاوي حقولك فيسبوك مليان ناس حتقولك ده، انا بقولك اللي بيحصل ع الأرض وفي الواقع، الاسعار حتزيد بسبب زيادة الأسعار من المصانع نفسها سواء في الصين او اوروبا، والسبب التاني ان الدولار "طالع" ، واسأل صاحبك أو قريبك او زميلك عمياني كده ممكن يوصل كام ، حتلاقي اجابات "تخض" حتى لو الاجابات دي مبالغ فيها، بس ده يديك فكرة ان كله بقى مستني فكرة زيادة الدولار.

نكمّل بكرة

بالمناسبة.. علامة زيكر حيتم تدشينها بشكل رسمي في يناير، يعني العربيات داخلة الميناء خلال الاسبوع ده وحنشوفها قريب