اسلام حويلة يكتب : أيوة كل شوية حنشوف علامة صينية جديدة في مصر

ناس كتير مستغربة من فكرة اطلاق علامات صينية جديدة في مصر، احنا لغاية اكتوبر 2024 ،عندنا في مصر تمثيل رسمي لـ 22 علامة صينية، ولسة في الطريق علامات اكتر.

في الصين علامات السيارات بالمئات، وزي ما شركات كتير بيتم انشاءها، في شركات اكتر بتفلس وبيتم إغلاقها ، لكن عشان تعرف ان العدد ده من العلامات متواجد في سوق ضخم جدا جدا، وعشان أقربلك المسألة ناخد كده مثال ازاي بيحسبوا مبيعات السيارات في الصين.

الأساس في حساب المبيعات هي المبيعات اليومية ، أو متوسط المبيعات اليومية في الأسبوع ، ناخد شهر اكتوبر الحالي مثلا ، فتلاقي ان المبيعات اليومية في الاسبوع الأول حوالي 50 ألف وحدة ، والمبيعات اليومية في الاسبوع التاني وصلت لـ79 ألف وحدة والاسبوع الثالث 63 ألف والاسبوع الرابع 78 ألف وحدة ، وكمان ده بانخفاض 5% عن مبيعات اكتوبر2023.

واخد بالك من مبيعات اليوم الواحد في الصين كام؟

عندهم أيام المبيعات بتوصل فيها لحوالي 100 الف وحدة ، يعني اكتر من مبيعات السوق المصري في سنة كاملة ، وبالتالي فرص أي علامة انها تبيع كبيرة مش صغيرة.

وفي نقطة مهمة جدا، انت متخيل هدف الشركة مثلا لمبيعاتها في مصر خلال أول سنة كام؟

100 عربية بس ، يعني أي وكيل يبيع 100 عربية في السنة هو كده حقق التارجت بتاعه ويعمل تارجت للسنة اللّي بعديها 170 عربية ، يعني المسألة سهلة جدا لأي شركة عربيات ليها تواجد وليها عملاء في مصر.

بس المفهوم السائد عن الشركات الصينية ان مصلحتها فوق الاعتبار ، هي بس عايزة وكيل يبدأ شغل معاها ، والله وبدون مبالغة، بيكون الوفد في مصر بيناقش مع الوكيل التطورات والاهداف وغيره، وفي نفس الوقت جزء من الوفد ده بيتفاوض مع شركات تانية للاستحواذ على الوكالة.. وبيفضل الحال كده لغاية ما يتفقوا مع وكيل قديم وتقيل ويكملوا بعد كده على طول.

طبعا سهل انك تفهم الرسم المرفق بعد ما قرأت الموضوع، انا اكيد مش بافهم صيني وأعتقد انك زي حالاتي برضه