اسلام حويلة يكتب : بايك BJ30 و جيتور T2.. الكلام على ايه؟

سألت نفسي ، لو حشتري عربية وعاجبني الشكل الصندوقي.. اشتري جيتور T2 ولا بايك BJ30؟

خلينا نجاوب في الآخر

جربّت بايك BJ30 النسختين الهايبريد والبنزين ضمن تجربة القيادة اللي نظمتها شركة ألكان اوتو للعين السخنة، لكن موضوعي هنا حيكون على الفكرة نفسها، بايك BJ30 ممكن نقول انها حتنافس بروحين، روح البنزين مع المنافس المباشر جيتور T2 وروح الهايبريد ودي حتنافس مع هافال H6 Hev ومن بعيد شوية مع دونج فينج هيوج ، باعتبار ان ثلاثتهم هايبريد وبنفس الفكرة.

خلينا في البنزين

جيتور T2 بدايتها واعدة ، رخصّت 98 عربية في شهر نوفمبر، والموزعين بيأكدوا ان الطلب عليها كبير وان الكميات اللي استلموها من الوكيل خلصت ، أمّا بايك BJ30 (البنزين) فهي أرخص حوالي 200 ألف جنيه ع الورق، لسة محدش عارف حيبقى في اوفر برايس ولا لأ؟ وغالبا أرقام التراخيص في فبراير حتكون مؤشر للتنافسية بينهم، وان كان رأيي الشخصي انهم الاثنين حيبيعوا الكميات اللي جابوها كلها واللّي جاية كمان.. بس قول ياااا رب يعرفوا يستوردوا طول السنة.

طب نرجع للسؤال الأهم .. تشتري أيهم لو حابب الشكل الصندوقي؟

المسألة مش بالبساطة دي، الاثنين تقريبا شبه بعض، والاثنين تقريبا توكيلاتهم محترمة، والضمان مش فارق 8 من 10 سنين.. والاثنين آداؤهم واحد واستهلاكهم للبنزين واحد والاثنين متجربوش قبل كده ومشوا سنين عشان تقدر تقول مين فيهم اعتمادية عن التانية.

طب نشوف مصاريف التشغيل ،نعرف قيمة الصيانات الدورية، وأسعار قطع الغيار الاستهلاكية؟

ما الاثنين عينهم على بعض، يعني لو لقيت فروقات مش حتفرق أصلا

أيوة يعني حتشتري ايه ؟

لو محتار بينهم فعلا اقرأ المواصفات كويس وشوف دي وشوف دي ، بعدين روح بنفسك واطلب تجربة قيادة، عند الوكيلين او عند الموزعين ، جرّب واحكم وشوف، بس بسرعة الله يكرمك لأن "المسائل" عمّالة تزيد والأسعار بتزيد.

طب مش انت جربّت.. ماتقول؟

مانا قلت يا خبيبي بس انت ماخدتش بالك