أوعى تسمع منهم⛔معارض عربيات تخصص "نصب" على الزباين😏

👈طبعا سمعت وحتسمع كتير عن عروض "مالية" مواقع التواصل عن معارض بتقدم عروض كتير ومغرية جدا لشرا العربيات بالتقسيط، وحتسمع جملة أفضل تقسيط في مصر ، والحق زيرو فايدة وادفع النص والباقي مش عايزينه منك، وكاش باك 600% واي "هجص" بـ3 ميلم.

👈وللأسف زباين كتير "بيتنصب" عليها لقلة خبرة أو قلة "دراية" بالأمر، لازم كل واحد نازل يشتري عربية جديدة يعرف مجموعة ثوابت لا غنى عنها.

📌متصدقش حد غير نفسك ، بمعنى اعرف سعر العربية قبل ما تنزل وتتحرك، تبقى عارف سعرها الرسمي كام❓ ومين وكيلها❓وحتروح لموزع رسمي ولا تاجر❓ هل العربية عليها أوفر برايس ولا لأ❓

👈لازم تعرف ان فايدة البنوك في احسن العروض والأحوال 13.5%، يعني أبو 5 أو 8 % ده سيبك منه، أولا لانه لو مش "نصّاب" يبقى بيلف ويدور عليك ، م الآخر "بيحور".. حيرفع السعر عليك ، حيزود مصاريف ادارية على سعر العربية مش سعر القرض او التمويل.، حيجبرك على وثيقة تأمين بضعف سعرها..الخ، خدها قاعدة 📌الحدّاية مبتحدّفش كتاكيت📌.

👈حتشتري بالتقسيط، يبقى تقعد وتسأل وتشوف كل "تفصيلة" وفي الآخر تشوف حتدفع اجمالي كام بعد خمس أو 10 سنين، وبعد كده تسيبه وتمشي.

📌ادخل على معرض تاني "ماليين البلد" وكرّر القصة، ومحدش يقولك على سعر اي حاجة بعدين، كل شيء لازم تبقى عارفه.

👈والاسماء الكبيرة معروفة.. سيبك من دوشة السوشيال، انا بتكلم عن الاسماء الكبيرة بتاريخها في السوق، موزع لكام علامة قديمة ومعروفة، طب شغّال مع أي وكيل.. لمّا تتطمن انه معرض محترم، اقعد واسأل عن كل التفاصيل، وبرضه تسيبه وتسأل عند غيره📌ابني في ايدى وأدور عليه‼️

👈في النهاية انت كزبون أو عميل انت السيد، متخليش لهفتك ع العربية توقعك في حد "نصّاب" كلامه غير فعله.