اسلام حويلة يكتب :

يا مواطن .. BYD وصلت انها تشحن العربية بالكامل في 6 دقائق بس

Super e-Platform flash charging

مجموعةBYD عملت منظومة اسمها Super e-Platform flash charging ، تقدر تشحن بطارية عربيتك في 6 دقائق بقوة 1 ميجاوات (1000 كيلووات) ودي أحدث تكنولوجيا وصل ليها شحن العربيات الكهربا في العالم

📌أزاي يا ود عمي❓

👈 بشكل مبسط جدا، الكهربا في بيتك جهد 400 فولت، وبعض العربيات الكهربا "الفواخر" بدأت تشتغل على 800 فولت، المعلم شوانفو رئيس BYD قالك واحنا زي الناس‼️احنا نبدأ بـ1000 على طول ونعلّي بعد كده.

📌طيب عشان يوصلوا لكده ..عملوا ايه❓

1️⃣عشان يشغّل كهربا بضغط 1 ميجاوات يعني الكهربا تعدي في الكابلات بسرعة وقوة كبيرة جدا، يبقى مبدئيا التيار لازم يكون بقوة 1000 أمبير، يعني تزويد ضغط الكهربا "الفولت" والقوة بتاعتها "الأمبير" لأقصى درجة عشان البطارية تتشحن في أسرع وقت.

2️⃣شحن 1000 كيلووات "أقوى شاحن ممكن تشوفه في عربية ملاكي" اترجم انك تشحن البطارية لمدة 5 دقايق فتديك مدى سير 400 كيلومتر ، سرعة الشحن بتوصل لـ2 كيلومتر كل ثانية بمعدل شحن "10C" وده معناه إن البطارية تستحمل الشحن بالكامل نظرياً في 6 دقايق، ودي قدرة عالية جدا على "الامتصاص" السريع للكهربا.

3️⃣عشان تقدر تعمل ده لازم البطارية تقدر تستحمل الشحن الفائق بدون ما تولّع، وده يدخلنا على تعديلات اللي حصلت على الـ Blade Battery الخاصة بـ BYD

◀️زي تخفيض المقاومة الداخلية للنص، لأن المقاومة هي اللي بتخلي البطارية تسخن أثناء الشحن السريع.. مقاومة تقل سخونة تقل سرعة تزيد.

◀️تاني حاجة نظام تبريد يكون فاعل بصورة اكبر، العربية فيها نظام تبريد سائل قوي جدا وبيبرد البطارية من فوق وتحت عشان يحافظ على سلامتها وعمرها
كمان استخدموا رقائق اكترونية متطورة اسمها SiC، ودي بتخلي الكفاءة الكهربائية للمحرك توصل 99%، وده بيقلل الهدر في الطاقة.

4️⃣بعدين اشتغلوا في المنصة الجديدة على المحرك نفسه ،وبقى يلف بسرعة 30 ألف لفة في الدقيقة "RPM" ، وده خلى أداء العربية سوبر رياضي.