تراخيص أكتوبر.. انفجار السوق.. و مان دريم وكيلا لعلامة BYDاسلام حويله يكتب :

👈قبل دقائق من إقلاع الطائرة الى الصين اتكلمت مع السيد هشام الزيني رئيس تحرير الأهرام أوتو حول تقرير التراخيص لشهر أكتوبر والتي تصدره مؤسسة الأهرام بالتعاون مع المجمعة المصرية للتأمين وقلت بالنص التقرير في حاجة غلط..27638 وحدة رقم مش كبير ده "مهول".. وان السوق في عز الرواج ما قربش من الرقم ده نهائي.

👈رد عليا وقالي في اكتر من 8000  عربية ملاكي "زيرو" موديل ما قبل 2025 تم ترخيصهم في أكتوبر ،وده اللي عمل الطفرة في التراخيص.

👈بالتأكيد الطفرة في التراخيص كانت على كل العلامات تقريبا بنسب مختلفة.. 

👈المركز الأول وكالعادة علامة نيسان بعدد3034 وحدة وده اعلى رقم حققته نيسان في 2025.

👈المركز الثاني استحوذت عليه علامة شيري بعدد 2838 وحدة وبرضه ده أعلى رقم تراخيص تحققه شيري في شهر واحد.. قدرت من خلاله تاخد الترتيب التاني لعام 2025 من علامة هيونداي اللي جت في المركز الثالث بعدد 2263 وحدة.

👈علامة MG تراجعت في الترتيب للمركز الرابع وان زادت تراخيصها برضه الى 2062 وحدة ..يعني يفضل الأربعة الكبار زي ماهم مع لعبة الكراسي الموسيقية كل شهر بين التاني والرابع.. الاول أمره محسوم من بدري لنيسان.

👈الخامس من نصيب علامة كيا بعدد 1376 وحدة.. وعلامة جيتور ولأول مرة تحتل الترتيب السادس بعدد 1136 وحدة..متفوقة على علامة مرسيدس اللي جت في المركز السابع بعدد 1105 وحدة.. ووراهم علامة تويوتا في المركز الثامن بعدد 940 وحدة

👈علامة BYD طلعت الى المركز التاسع بعدد 914 وحدة.. حد بالك دي علامة شغالة ببقايا موديل F3 وبالجهود الذاتية للمستوردين.. فما بالك لما تنزل في يناير مع وكيلها الجديد مان دريم Man Dream وتبدأ الشغل رسمي

👈سوزوكي البعيدة تماما عن قائمة الأكثر مبيعا في 2025 بترجع بقوة وتدخل القائمة في الترتيب العاشر بعدد 848 وحدة.. حتى وان كان عربيات سوزوكي "التمناية" بتترخص ملاكي.

بالمناسبة.. شركة مان دريم Man Dream إحدى شركات مجموعة المنصور.. يعني زي مان ايست وكيل سوايست.