انسى اسم سونج بلس ده خالص.. BYD مش نازلة مصر تهزر

👈السبب الرئيسي لتفوق BYD هو البطارية.. الشركة في الأصل بتصّنع بطاريات واضافت صناعة العربيات لاحقا، ولمّا حصل التحول للكهربا كانت BYD عندها "النوهاو" وهي الشركة الوحيدة اللي بتصنّع بطارياتها الخاصة (Blade Battery) بطارية ليثيوم فوسفات الحديد LFP

👈في 2022 تم وقف انتاج العربيات العادية وتخصصت في العربيات الكهربا BEV أو الهايبريد القابل للشحن PHEV.

👈بتملك 4 علامات رئيسية للعربيات الملاكي.. أولها BYD اللّي  بتنقسم الى سلالتين

1️⃣ سلالة بإسم دينيستيDynasty  ودي بيندرج تحتها 4 موديلات بأسماء اشهر العائلات الصينية ..هان وسونج وتانج وتشين وكلهم بيتقدموا بنسختين BEV وPHEV.

2️⃣السلالة التانية اسمها أوشنOcean  ودي بيندرج تحتها  5 موديلات بأسماء الكائنات البحرية، سيل ، دولفين ،أتو وسي جل وسي ليون لكن الموديلات دي بتنزل BEV بس.

📌طبعا حتسأل فين سونج بلس❓

انا سعيد انك سألت السؤال ده.. وركّز معايا عشان متتلخبطش، في عربيات خاصة بالسوق الصيني بس، وأسماء خاصة كمان، سونج بلس ده اسم خاص بالسوق الصيني ، بينزل بنسخة BEV ونسخة PHEV، في الاسواق الخارجية بتنزل تحت أسماء مختلفة.. مثلا في اوروبا إسمها Atto 3 للنسخة الـBEV وأحيانا Seal U للنسخة الـPHEV.

📌أيوة لمّا ينزل الموديل مصر مع الوكيل الجديد مش حيكون اسمه سونج بلس.

👈في 3 علامات تانية من مجموعة BYD زي 2️⃣علامة دينزا Denza الفاخرة ودي كانت تعاون مشترك مع مرسيدس – بنز وحاليا مملوكة بالكامل لـ BYD وعندهم 4 موديلات منهم موديل واحد MPV اسمه D9 وموديل سيدان رياضيZ9 GT  وموديلين SUV واحد اسمه N7 والتاني N8.

3️⃣العلامة التالتة يانج وانج Yangwang بتقدم موديلين وحش الدفع الرباعي  U8 والتاني U9 اللي بقت اسرع عربية كهربائية في العالم حققت سرعة قصوى 496.22 كم/ساعة.

4️⃣العلامة الرابعة والأخيرة والأحدث اسمها فانغ تشنغ باو Fangchengbao ودي مفيش منها غير موديل واحد SUV اسمه Bao 5 دفع رباعي فاخر مخصص للطرق الوعرة.