تراخيص سبتمبر⬅ معاناة السيارات الأوروبية‼️هل الحل تخفيض اسعار الصيانة وقطع الغيار❓

لو شفنا الـ430 موديل اللي بيترخصوا في السوق المصري، حنلاقي منهم 162 موديل أوروبي ، طبعا الـ27 علامة الأوروبية كلهم ممثلين بشكل رسمي عن طريق الوكلاء، بس ده لا يمنع من وجود موديلات كتير بتدخل عن طريق التجار.

👈لو استبعدنا "الفواخر" من الـ162 موديل حنلاقي عندنا حوالي 26 موديل بس من علامات بيجو واوبل وستروين ورينو وكوبرا وسكودا وسيات وفولكسفاجن وفيات.

👈تراخيص سبتمبر بتوضّح بشكل كبير معاناة العلامات الأوروبية في السوق، همّا بس 6 موديلات اللي تراخيصهم زادت عن شهر أغسطس، ورغم ان التخفيضات طالت عدد كبير من الموديلات لكن همّا 6 بس اللي "لقطوا"، والـ20 موديل الباقيين تراجعوا بشكل كبير وملحوظ.

👈ولو ضفنا ليهم علامات تويوتا ومتسوبيشي يبقى عندنا مؤشر على تغير في سلوك المستهلك اللي كان رافض تماما فكرة العربية الصيني.

👈لأننا منقدرش نقول ان شهر سبتمبر اداؤه ضعيف أومتوسط، بالعكس مقارنة بالسنين اللي فاتت سبتمبر 2025 عامل رقم كبير جدا ، والشهر ده دايما كان بيبقى واقع نسبيا..عودة من "المصايف" ودخلة "المدارس" ويرجع السوق يفوق في اكتوبر ونوفمبر.

👈و الأرقام بتقول ان أداء سبتمبر كان جيد جدا، وحصلت زيادات بيعية في العلامات الصينية والكورية والمجمعة محليا.

📌موديلات 2026 ونزلت، تخفيضات أسعار وحصلت، تبقى المشكلة فين❓

👈طبعا المنطق بيقول اننا مينفعش نحكم على شهر او اثنين او حتى 3 شهور، لكن انا شايف انه لازم المستهلك ده تحديدا يتم دراسته بشكل جيد وتلبية بعض احتياجاته، لأنه هو اللي مشّغل كل العلامات دي حتى الآن ، ولو "اتسرسب" واحدة واحدة ، العلامات دي حتعاني بشدة السنين الجاية.

👈ومازلت عند رأيي ان وكلاء الأوروبي محتاجين يشتغلوا على قصة أسعار الصيانة وقطع الغيار، انت مش حتعرف "تجاري" الصيني في الاسعار، فهات عميلك من ما بعد البيع، اديله ميزة "زيادة" يخليه مكّمل عندك.

📌بالمناسبة.. لمّا المستوردين يبيعوا 391 عربية BYD كهربا في شهر واحد ، ممكن المنصور يبيع كام لمّا يعلن عن الوكالة بشكل رسمي❓بكرة نتكلم في القصة دي