اسلام حويلة يكتب :

تراخيص أغسطس..فئة الـ7 مقاعد بين شيري وجيتور وسوايست

شيري تيجو 9 TIGGO9 CSH

طالما السوق تقريبا "ميت" وحركة البيع والشرا واقفة، تعالوا نتكلم شوية عن فئة الـ7 مقاعد والمنافسة بين جيتور وسوايست وتراخيصهم في شهر أغسطس

بس السوق مش واقف أوي يعني❓

شوف تعبير السوق واقف أو ميت ده معناه ان المبيعات مش مكملة نص المتوقع، واول ما تشوف العربيات اللي كانت بتتباع بأوفر برايس وصل لـ100 ألف وحاليا بخصم 20 و30 ألف جنيه اعرف ان الدنيا واقعة.

إقرأ أيضا للكاتب اسلام حويلة :

سيارات كهربائية صينى؟! اقف عندك الـ" Game" كله اتغير النهاردة

تراخيص جيتور وسوايست في أغسطس ، بس خلينا نقول قاعدة مهمة في الأول، مينفعش نبني على شهر او اثنين.. المسألة محتاجة وقت عشان تعرف تحكم او تحلل بشكل منطقى.. انا هنا بس بقول ملاحظات مش اكتر.

جيتور عاملة مبيعات جيدة، وخد بالك جيتور العلامة الوحيدة اللي كل عربياتها اوفربرايس ، ومع ذلك تراخيصها في اغسطس 758 وحدة ، تفصيلهم كالتالي : داشينج 225 وحدة - T2 عدد 227 وحدة - T1 عدد 115 وحدة - X70 Plus عدد 139 وحدة - X90 plus عدد 38 وحدة ، طبعا X70 فيس ليفت متلحقش تظهر في التراخيص.

في المقابل سوايست (الاطلاق يوم 21 يوليو) قدرت على طول ومن أول شهر انها تتواجد وسط الكبار، لكن الأرقام كانت مفاجأة شوية ، الكلام والشو الاكتر كان على S05 رغم انها رخّصت أقل عدد من بين موديلات العلامة (87 وحدة) في حين كانت S07 الأكثر ترخيصا بعدد 255 وحدة، S06 رخّصت 101 وحدة و S09 رخّصت 152 وحدة.

إقرأ أيضا للكاتب اسلام حويلة :

حرام عليك تشتري عربية بالتقسيط قبل يوم 2 اكتوبر⛔الدنيا مطارتش

الأرقام بتقول ان داشينج باعت اكتر من ضعف S06 ،لكن يبدو ان موقف X70 Plus المجمعة محليا حيكون صعب جدا امام منافستها S07 المستوردة، امّا جيتور X90 plus فأرقامها متواضعة جدا امام سوايست S09.

خليني افكركم شوية بالأرقام، مجموع تراخيص العربيات لفئة الـ7 مقاعد الصيني من يناير ليوليو 3976 وحدة ، تراخيص شهر أغسطس لنفس الفئة 1024 عربية

شيري تيجو 8 بفئاتها 400 عربية ، سوايست 407 عربية، جيتور 187 عربية