حرام عليك تشتري عربية بالتقسيط قبل يوم 2 اكتوبر⛔الدنيا مطارتش

اجتماع لجنة السياسات النقدية الجاي يوم الخميس 2 اكتوبر ، وأغلب الخبراء توقعوا بأن خفض سعر الفائدة مؤكد وبنسبة 2%، وربطوا بين قرار الدولة عدم رفع أسعار الكهرباء وبين استمرار الهبوط بمعدل التضخم ، وبالتالي تراجع تكلفة الاقتراض سواء للحكومة او للقطاع الخاص.

📌ده معناه ايه سيادتك❓

لو حضرتك مقرر تشتري أي منتج أوعربية بالتقسيط يبقى تستنى لغاية يوم 2 اكتوبر - لو مقرر تشتري "كاش" فالموضوع ده مش بتاعك - كلها اسبوعين يعني "الدنيا مطارتش"، لأن نزول سعر الفائدة حيوفر عليك مبلغ محترم كل شهر.

طبعا مش عايز أعيد الحسابات والقصة اللي قلتها قبل كده -حتلاقي اللينك في التعليقات- لكن حيبقى أكبر غلط لو اشتريت عربية خلال الاسبوعين دول بالتقسيط.

ومش عايز أقول لكل تاجر وموزع متابعني، حيبقى حرام عليك لو منبهتش أي عميل داخلك عايز يشتري بالتقسيط ، لأن احتمالات خفض سعر الفايدة كبيرة.

بس كده المبيعات ممكن تتأثر والحال يقف❓

ماهو العميل بتاعك لمّا يسمع منك حيحترمك أكتر، والمسألة تأجيل الشراء بس، مش الامتناع عنه ، يعني العميل حيرجعلك ويشتري منك برضه.

ندخل على سؤال مهم..هل أسعار العربيات حتنزل تاني❓

التوجه العام ان في تخفيضات تانية ممكن تحصل، لكن ايه الموديلات؟ صعب جدا حد يتوقعه.. يعني مثلا كل المهتمين كاتوا عارفين ان الدور في التخفيضات جاي ع الأوروبي ، بيجو وسيات وسكودا وفولكسفاجن واوبل ، وتم بالفعل.

📌انت نسيت رينو❓

الفكرة ان رينو اوروبية بس وضعها مختلف شوية عن باقي الماركات، لأن عندها موديلات أسعارها أقل من الاوروبي  بكتير، وناس كتير رافضين يركبوا صيني مهما بلغ شأنه ، بيشوفوا ان رينو افضل اختيار ، لكن مع نزول اسعار ميجان وداستر، متقدرش تقول ان مفيش تخفيضات تاني.

ميجان بتبدا من مليون و90 ألف جنيه وده يخلي عميل الصيني في فئة السيدان دي يفكر كتير، ويخلي كمان الشركات اللي بتقدم عربيات في الحدود السعرية دي تجهّز نفسها لتخفيضات تاني، همّا بس مترقبين الشهر ده ..ميجان حتعمل ايه❓