اسلام حويلة يكتب :

سيارات كهربائية صينى؟! اقف عندك الـ" Game" كله اتغير النهاردة

BMW iX3

كنت معتقد ان الصين بشركاتها هيمنت تماما على العربيات الكهربا ، وكانت كل الشواهد بتؤكد ده، ودايما كان عندي قناعة ان السبب الرئيسي لده ان الصين عندها تقريبا 80% من المعادن الأرضية النادرة ، وكمان بتستحوذ على 90% من صناعة معالجة المعادن في العالم.

لكن اللي شفته النهاردة في اطلاق BMW iX3 وان مفهوم Neue Klasse بقى واقعي وع الأرض ، أعتقد الوضع حيتغير ، وبقول أعتقد لأن أوليفر زيبسه رئيس BMW جروب ما أعلنش السعر وتم ارجاؤه لحين قبيل انطلاق المبيعات التجارية.

لأن لو السعر كان منافس – متنساش انها BMW – تركيبة قطاع العربيات الكهربا حتتغير خالص.. وعشان أوضح الصورة اكتر محتاجين نسأل نفسنا سؤال مهم:

هو ليه عميل ممكن يركب Avatr مثلا ويفضلها عن BMW ومرسيدس

في رأيي بسبب التكنولوجي المبهر الموجود في العربيات الصينية ومدى السير بدون شك، طب لو لقيت عربية افاتر وعربية BMW بنفس مواصفات الأداء والتكنولوجي ، والسعر متقارب.. حتختار مين

الاجابة ع السؤال ده واحدة سواء كنت عميل مصري أو اجنبي ايا جنسيته ، قولا واحدا BMW.. تاريخ وفخامة وجودة واسم وكل حاجة.

أهو ده اللي اتحقق النهاردة من Neue Klasse واللي كانت بدايته BMW iX3..

الفلسفة اللي اعتمدتها BMW في رأيي انها تكون عندها استقلالية كاملة تتيح ليها المرونة والسيطرة على التكاليف ، استقلالية انك تبتكر بطارية تقريبا مفيش في مكوناتها معادن ارضية نادرة ، تشتغل على خلايا اسطوانية مش عادية ، بطاريات بتاعتك مش واخدها من شركة تصنيع بطاريات ، صحيح بيتم انتاجها في 5 شركات تصنيع لكن البطارية بتاعت وملك BMW.

خد بالك خطوة Neue Klasse من BMW دي البداية الحقيقية في المنافسة.. ولسة الجاي أفضل الـ" Game" اتغير